Plie paidbah u Myntri sorkar ïa ka jaka pynlang mar rep kaba kot 75 lak ha Nongsleh
Nongstoiñ, Nailur 23 : Ka Nongsleh Mawsaw Integrated Village Cooperative Society (IVCS) ka la ïoh ban plie paidbah ïa ka warehouse kaba 500-metric ton, ïa kaba la tei lyngba ka jingïarap kyrshan pisa ka haduh 59,11,046 tyngka na ka MLA MP lyngba ka MBMA bad kumjuh 15,76,375 tyngka lyngba ka ram na ka LIFCOM, ha kaba ka jinglut baroh ban tei ïa katei ka jaka pynlang mar rep lane ‘warehouse’ ka la kot shaduh ka 74,87,781 tyngka.
Ïa katei ka jaka pynlang mar rep la plie paidbah da u Bah Methodius Dkhar Myntri ka sorkar Jylla, ha ka sngi ba ar ha ka jingïalang kaba la long hapoh ka shnong Nongsleh, ha ryngkat ka jingïadonlang ruh u Bah S.Rashir MDC ka Mawshynrut Constituency, u Bah T.Diengngan District Horticulture Officer West Khasi Hills, u Bah Aiborlang R. Nongkhlaw District Project Manage, MBMA, West Khasi Hills bad kiwei kiwei.
Na ka liang ka Society ha ka sngi ba la plie paidbah ïa ka, ka la ïoh ruh ban pdiang ïa ki tiar ban pyndonkam ha ka rep ka riang kum ki power tillers, sprayers, grass cutter bad kiwei kiwei de ki ban ïarap ban pynsuk ïa ki nongrep.
Katba na ka liang u Bah Methodius Dkhar ha ba kren ha ka jingïalang kum u kongsan, u la ai ka jingïaroh ïa ki ophisar kiba la trei shitom ban pynïoh ïa katei ka warehouse kaba la bit la biang bad kumjuh ïa ki tiar kum ki power tillers, sprayers, grass cutters bad kiwei kiwei ki ban ai jingmyntoi ïa ki nongrep.
U la ong ruh ba naduh ba u ïoh lad ban mihkhmat ïa ka constituency kum u MLA bad Minister, um ju klet hynrei u ïai kynmaw ïa ki paidbah ka dong ka thaiñ, namar la ïohi bad mad ïa ka rukom im ha ka rep ka riang naduh ki por kiba mynshwa, ha kaba u la ju pyrkhat halade ba lada don ka lad ka lynti ban ïa kyntiew lem ïa ka rep ka riang hapoh ka dong ka thaiñ.
U la ong ruh ba ka jingïoh ïa ki tiar na ka tnad Horticulture kan long ka jingmyntoi ïa ki nongrep bad kan pynsuk ruh ïa ki. Kumjuh ka jingdon jong ka kane ka jaka pynlang mar rep, kan ïarap ïa ki nongrep ban buh ïa ki mar rep bad ban sa die hadien ba la kham biang ka dor ha iew ha hat.