Pynleit jingmut ha la ki kam, ym ban shu bud tynneng bad nang ruh ban mang lypa ne ka budget : AL Mawlong, IAS
Mawkyrwat, ‘Nailur 23 : Ka Reserve Bank of India (RBI), Shillong, ka la pynlong ïa ka Townhall Meeting halor ki Micro, Small and Medium Enterprises (MSMEs) ha ka Multipurpose Hall, DC Office, Mawkyrwat.
Ka thong bad ka jingthmu jong kane ka jingïalang ka long ban pynsngewthuh bad ai jingtip ïa ki nongpynmih jingkamai kiba la don lypa bad ïa kito kiba dang thmu ban seng kamai, halor ki bynta bapher bapher kiba ïadei bad ka jingpynïarap pisa ïa ki MSMEs, ki skhim jong ka Sorkar, bad ka jingkyrshan na ki kynja tnat bad kynhun bapher bapher kiba don bynta ha ka jingroi bad jingkiew jong ki karkhana bad ki enterprise.
Ka prokram ka la sdang da ka jingpynrung kyrteng ïa ki nongïashim bynta, hadien kata la pynsngew ïa ka jingthmu jong ka jingpynlong ïa kane ka prokram da u bah Olden Nongpluh, General Manager (O-i-C), RBI Shillong, bad ka jingkren ryngkat ka jingplie paidbah ïa kane ka prokram ba la kren da ka kong Aitinolin L. Mawlong, IAS, Deputy Commissioner, South West Khasi Hills District, kaba long ruh ka Kongsan jong ka jingïalang.
Haba kren ha ka jingïalang, kong Aitinolin L. Mawlong, IAS, Deputy Commissioner, South West Khasi Hills District ka la ong ba kane ka prokram ka long kaba donkam bad ka kabu ksiar na ka bynta kito kiba don jingthmu ban seng ïa ki kam la jong da kaba pynshlur ïa ki ban shim ïa kane ka lad kaba long ha kajuh ka por ka kabu ksiar na ka bynta ban nang kham pynheh shuh shuh ïa ka seng ka dang jong ki. “Lada ki kwah ba ki kam ki jam jong ki kin long kiba jop ne ba kin nang kiew, ki dei ban long borabor kiba treishitom, long kiba pynleit jingmut ïa ki kam ba ki ki trei ym ban shu bud tynneng, bad nang ruh ban buh ïa ka jingmang lypa ne budgets”, ai jingmut ka kong Aitinolin L. Mawlong, IAS.
Ha kane ka prokram la pynlong ruh ïa ki jingpynshai bad jingpyni ïa ki skhim bapher bapher kiba ïadei bad ki MSMEs da u bah Jubanlak Khongwir, nongmihkhmat na ka Reserve Bank of India (RBI), Shillong; ka kong Eden Grace Rajee, na ka Small Industries Development Bank of India (SIDBI); bad u Vikas Verma, na ka MSME Development and Facilitation Office (MSME-DFO).
Ki nongmihkhmat na ka District Commerce and Industries Centre (DCIC), South West Khasi Hills District, lyngba u bah M. War, General Manager, ka Dr. A.N. Marak, District Animal Husbandry & Dispensary Veterinary, South West Khasi Hills District, u bah Rana A. Lyngdoh, na ka Meghalaya Rural Bank (MRB), Shillong bad u Manish Madhukar, AGM SME, State Bank of India (SBI), Shillong, ki la ai ruh ïa ki jingtip bad jingpynshai kiba ïadei bad ki nongpynmih kamai bad ki nongpynlong business.
Ha kajuh hi ka sngi la sam kumba 6 tylli ki loan sanction sha ki nongseng kam lajong khnang ba kin nang lah ban pyntyllun ïa ki kam nangne shakhmat.
Ha ka jingïalang la pynsngew ruh ïa ki khana jingjop jong ki nongseng ka seng jam la jong ne ki business kiba la seisoh ha ka kam jong ki, lyngba ka ka Anticy Iawphniaw, u bah Kitarland Lyngdoh, u bah June Robert Lyngkhoi bad u bah Ioannis Shylla.
Hadien kata la pynlong ïa ka jingïamir jingmut bad ki nongïashimbynta, ha kaba ki la ïoh lad ban pynpaw ïa ki jingai jingmut bad ban kylli ïa ki jingkylli kiba ïadei bad ki ki Micro, Small and Medium Enterprises (MSMEs).
Ka prokram ka la poi sha kaba kut da ka jingaikhublei da u Bongoni Rakesh, Manager, RBI Shillong.