Shillong, Naitung 29: Ka sorkar India ha ka sngi Thohdieng kan pynlong ïa ka National Conference kaba nyngkong ha ka ri ban pynduh ïa ki 30,000 kilo tam ki drok ha kaba u Myntri ki Kam Poh Ïing ka ri u Amit Shah ryngkat ki Myntri Rangbah jong ki jylla bapher bapher. Kane ka Conference kaba ka sorkar kan pynlong ka long ruh kum shi bynta ka jingpyrshang ka sorkar India hapoh ka jingïalam u Modi ban pyllait ïa ka ri na ka jingma jong ki drok.
Ha kane ka conference u Myntri ka tnat ki Kam Poh Ïing ka ri un ai jingkren na Chandigar halor ka phang ‘Drug Trafficking and National Security’. Ki Myntri Rangbah jong ki jylla Haryana, Himachal Pradesh bad Punjab, bad u Administrator ka Chandigarh, ki ophisar ka BSF, NIA bad NCB ha ryngkat ki khlieh duh jong ka ANTF na ki jylla bapher bapher bad ïa ka jingpynduh ïa ki drok yn pynlong ha ki saw jaka: Delhi, Chennai, Guwahati bad Kolkata ha kaba u Amit Shah un sakhi ïa kane lyngba ka Video Conference.
Kumban shu kderw hangne ka Narcotics Control Bureau(NCB) ka la sdang ïa kane ka prokram ban pynduh ïa ki drok naduh ka 1 tarik u Jylliew, 2022, bad haduh mynta ki kynhun ka NCB ki la lah ban pynduh kumba 51,217.8402 kilo ki drok ha 11 tylli ki jylla haduh ka 29 tarik u Naitung.
