Da ka PIL yn ujor sha ka sorkar lada ka dang sngap mynthi halor ka surok: SSHL

Mawkyrwat, ‘Nailur 20: Ka Seng Samla Hima Langrin (SSHL) ha ka jingïalam jong u bah Pynshailang Lyngdoh ha ka sngi saitjaiñ jong ka taïew ka 19 tarik u ‘Nailur, 2026 ka la pynlong ïa ka jingialang paidbah ha shnong Phlangdiloiñ, South West Khasi Hills District ban dawa na ka sorkar jylla bad na u nongmihkhmat ba dei ban siang rong noh ïa ka surok na Wahkaji sha Phlangdiloiñ ka ban kut ha shnong Langpa ki shnong hapoh South West Khasi Hills District.
Ym tangkata ki la dawa ruh ba dei ruh ban trei noh ïa ka surok na Langpa ka ban mih sha Ranikor ha kaba kane ka surok ka dei kaba pynïasnoh ïa ka Ranikor bad ka Phlangdiloiñ khnang ba kan pynsuk ïa ka leit ka wan jong ki paidbah khamtam eh ha ka pang ka shitom.
Haba kren ha ka jingïalang u bah Pynshailang Lyngdoh ula ong ba ka sorkar ka la leh mei-nah sha ba palat ïa ka surok Wahkaji sha Phlangdiloiñ kaba la kot mynta 50 snem naduh ba la trei ïa ka wat la ka dei ka hima kaba pynmih shibun ïa ka khanjna na ka bynta ka sorkar jylla.
U la ong shuh shuh ba ka Seng Samla Hima Langrin ka la shim ruh ïa ka rai ban ai por ïa ka sorkar jylla tang 6 bnai ban siang rong ïa ka surok na Wahkaji – Phlangdiloiñ sha Langpa bad lada ka sorkar lyngba ka tnad PWD (Roads) ka dang sngap mynthi ïa ka jingdawa jong ka seng, kan sa ujor noh da ka PIL hapoh ka High Court pyrshah ïa ka sorkar.
Ha kajuh ka por, u bah Pynshailang Lyngdoh ula pynrem ruh ïa ka sorkar jylla ba ka kmen tang ïa ka jingïoh ïa ka khajna kaba bun na kane ka hima katba ïa ka roi ka par pat kam patiaw ne phai khmat ei ei ruh em sha kane ka hima.
Namarkata, ula kyntu ïa ka sorkar jylla ba ka dei ban phai khmat lang noh sha kane ka dong ka thaiñ namar ki paidbah ki la mat palat 50 snem ïa kane ka surok khoh-ruh khoh-ram khlem pat ïoh rong naduh ba la sdang pyntrei ïa ka haduh mynta.