U MLA ba nyngkong bantei ïa u motdur jong u Tirot Sing hapoh ka konstitwensi lajong

Shillong, Nailur 20: U Myntri ka tnad Arts & Culture uba dei ruh u MLA ka South Shillong u bah Sanbor Shullai ha ka sngi Saitjain u la plie paidbah ïa u mot jong U Tirot Sing, u nongialeh laitluid ba pawnam ha Laban, da kaba ong ba u dei palat ban ïa u mot sahnam – ka dei ka jingkhot ïa ki samla ban tip ïa ka histori jong ki.
U Bah Sanbor Shullai u la ong ba ïa kane ka kam la shim ryngkat bad ka Raid Laban Sports, Social and Cultural Organisation Club bad la pyndep hadien ba la ioh ïa baroh ki jingbit.
Ïa une u mot dur la pynieng ha ka jinglut kaba long T.10 lak bad kane ka jaka ba tei ïa u mot ha ka shnong Lumshatsngi jong ka dong New Kenches Trace, mynshwa kadei ka jaka theh ñiut hynrei mynta ka lah kylla long ka jaka ba itynnad.
“Ngi la thoh sha u Deputy Commissioner bad sha u Executive Engineer, PWD ban ioh ïa ka NOC, ngi la ioh bad khatduh, hadien ba ngi la ioh ïa ka jingbit na ophis u Syiem ka Hima Nongkhlaw, ngi la sdang ïa ka kam bad mynta ka sngi, lyngba ka jingkyrkhu u Blei, ngi la lah ban pyndep ïa ka kam,” la ong u bah Shullai.
Haba phah ïa ka khubor sha ka pateng kaba thymmai, u la ong, “Phi dei ban pule ïa ka histori jong ki riewshlur jong ngi kum u Tirot Sing Syiem, khnang ba phin tip bha.Lait na ki kot kiba phi pule ha skul bad kolej, phi dei ban pynlut por ban leit sha State Central Library bad ban thied ia ki kot ban pule.”
“‘Ngim tei ïa une u mot tang ban kynmaw ïa u riewshlur ba khraw jong ngi, ngi tei ïa kane ban pynkynmaw ïa ki pateng ba ka jingshlur ka jingaiti bad ka jingieit ïa la ka jong ka ri ym lah ban klet satia’, ong u Bah Sanbor”
U Syiem ka Hima Nongkhlaw, u Phrester Syiemlieh uba la don lang, u la ong ba ka Laban hi ka long kaba don histori – shisien la tip paidbah bad ka nongbah Shillong na ka bynta ki nongkyndong kiba wan sha kane ka nongbah.
Haba batai ia ka history jong u Tirot Sing, u la ong ba u Tirot Sing u dei u Syiem ba 10 jong ka Hima Nongkhlaw uba la shimti ïa ka khet ha u snem 1804 ha ka por ba u dang khynnah.
“U la shimti ïa ka khet ha u snem 1804 ha ka por ba u dang khynnah, ha kaba ïa ki kam jong ka Hima la pyniaid da u Kñi jong u… hadien ba u la dap 18 snem, u la shimti hi ïa ki kam,” u la ong.
U Syiem u la pynkynmaw kumno ki phareng lyngba u David Scott ki la pan jingbit ban shna surok na Kamrup sha Sylhet lyngba ka Hima Nongkhlaw.
“U Tirot Sing u la lum ïa ka Dorbar ban ïakren ïa kane ka kam kaba kongsan bad la ong ba ka Dorbar ka la shim por ar sngi ar miet ban rai halor ka jingkyrpad jong ka sorkar phareng.Hadien ar sngi ka Dorbar ka la rai ban ailad lyngba ki kyndon kiba ka la buh,” u la ong.
Kata ka jingiateh kular, u la ong, ka dang don ha ka record.
“Ha ka jingïateh kular la thoh ba ka jingiateh ka dei hapdeng u David Scott jong ka East India Company bad u Tirot Sing Syiemlieh,” u la kdew.
“Kumta ngi ki khun ki ksiew ngi ioh ban tip thikna ba u Tirot Sing u dei na ka jait Syiemlieh… Na ka liang ka jait Syiemlieh, ngi la pyrshang ban ïakren bad ka Sorkar bad khamtam eh ngi la kyrpad ïa u Bah Sanbor Shullai uba dei u Myntri Sorkar ba peit ïa ka tnad Art and Culture ba lada long kaba lah dei ban pynbna paidbah ba ka kyrteng ba pura jong u Tirot Sing ka dei ka Tirot Sing Syiemlieh” ong u Syiem.
U la ong ba ki phareng ki la shet kylla ïa ka jingiateh kular.”Hadien kane ka jingiateh kular, ki phareng ki la sdang ban shna ia ka surok bad hadien ba ki la shna ïa ka surok ki la pyni ïa ka jingsarong, ka jingbym burom ïa ki khun shynrang bad kynthei jong ka Hima Nongkhlaw.Ki phareng ki la pynkhein ïa ka jingiateh bad khatduh ka Sorkar phareng lyngba ki ophisar bad ki shipai jong ka ki la kren bein ïa ki kynthei khynnah, bad kane ka pynlong ïa u Syiem Tirot Sing ban ym lah shah shuh ïa kane ka jingleh ki shipai phareng” u la ong.