Ha u EE ka tnat MePDCL Khliehriat buh dorkhas ki hynriew shnong kiba na Narpuh namar ka jingbym biang ka bor ding ha ka thaiñ bad jingbym treikam ka Sub Station Kuliang

Khliehriat nailur 17 : Na mar ka jingthut palat ka bor ding ha ka thaiñ kaba la buh jingeh ïa ki nongshong shnong jong ki shnong kiba don ha elaka Naepuh, kumta ki hynriew tylli ki Dorbar Shnong kiba na ka thaiñ Narpuh East jaintia Hills District ba kynthup ka shnong Kuliang, Pyrtakuna, Umkiang, Dona skur, Dona Umbluh bad Borsara mynta ka sngi ki la leit buh da ka dorkhas hakhmat u Executive Engineer ka tnat bor ding ka MePDCL Khliehriat Division Moowakhu bad ki la kyntu jur ïa ka tnat ba ka dei ban pyntreikam noh mardor ïa ka Sub Station kaba don ha shnong Kuliang kaba khlem treikam shuh mynta la bun bun bnai la kumba hynriew bnai tam.
Kum ban shu bynrap, ka elaka Narpuh ka dei ka elaka kaba heh bad kaba ïar kaba kynthup ïa ki shnong ba khappud bad ka ri Bangladesh bad ki shnong ba khappud bad ka jylla Assam, bun na ki shnong ki shaniah ïa ka jingioh bor ding electrict tang na ka Sub station kaba na Lumshnong mynta la bun tylli ki bnai bad ka thaiñ ka mad jingeh bha ha ka liang ka bor ding electrict namar ka jingthut kaba ju jia khah khah bad don ki por ba ki shnong ki duh bor ding da ki bun-bun sngi ruh, ka jingthut ka bor ding ka la ktah bha wat ïa ki kam ki jam jong ki paidbah nongshong shnong mamar ki don ki kam kiba hap trei da ka bor ding electric, nalor ba ka dei ruh ka thaiñ kaba shit bun ki longïing ki dei kiba pyndonkam ïa ki pangkha ban jah jingshit,
Mynta ka sngi ki hynriew tylli ki dorbar shnong ki la buh da ka dorkhas kaba la tip kum ka Joint Memorandum ha ka tnat bor ding bad ki la pynsngew ïa ki jingeh ba ki nongshong shnong ki ïakynduh na ka daw ka jingbym biang ka bor ding.
Katkum ka dorkhas lane ka Joint Memorandum ba la soi kyrteng da u Waheh Shnong Umkiang, bah Lasting Pala, Secretary shnong Umkiang, bah Nicholas Lyngdoh, Waheh shnong Pyrtakuna, bah Love-you Bareh, Waheh Shnong Kuliang, bah Min Lamare, waheh shnong Borsara, bah Diam Pohshna Wanbiangpor Lamin, Waheh Shnong Dona skur, bah Jenisal Pohkurn, Waheh Shnong Dona umbluh, bah Warit Tariang ki la ong “ Ngi pyntip ba ka Sub-Station jong ka tnat MePDCL kaba don ha shnong Kuliang ka khlem treikam shuh mynta la bun-bun bnai bad ka jingbym treikam ka Sub Station ka la wanrah jingeh ha ka jingioh bor ding ha ka thaiñ khamtam ha kitei ki hynriew shnong” shuh shuh ki bor shnong ki la kyntu ïa ka tnat bor ding ba kan pynlong da ka jingjurip ïa katei ka Sub Station ha Kuliang bad ban pynbit pynbiang bad ruh ban maramot noh mardor khnang ba ka Sub Station kan treikam pura noh, namar kumba long mynta kitei ki shnong ki ioh bording na ka Lumshnong Sub Station kata ruh lyngba ka 11KV Line bad bunsien ka don ka jingthut ha ka jingioh bor ding ha shnong Kuliang, Pyrtakuna, Umkiang, Dona skur, Dona Umbluh, Borsara, kane ka buh jingeh bha ïa ki nongshong shnong.
Ki bor pynïaid shnong jong kitei ki hynriew tylli ki shnong lem bad ki paidbah nongshong shnong ki khmihlynti bad kyrmen ba ka tnat bor ding jong ka MePDCL Khliehriat Division Moowakhu kan shim khia kham kloi ïa kane ka kam ban pynbit pynbiang noh kham kloi katba lah ia ka Sub Station ha shnong Kuliang khnang ba ki nongshong shnong kin nym mad jingeh than ha kaba ïadei bad ka jingioh bor ding.