Lap ka ARM ym don ba pynkhuid ïa ki jaboh ba sahkut ha ki nala ba tuid sha Wahmyntdu

Jowai, Nailur 16: Ka Advocacy Reform Movement (ARM), hapoh ka jingïalam jong u President, mynta ka sngi ka la aiti ïa ka dorkhas sha ka ophis jong ka CEO ka Jowai Municipal Board (JMB), hadien ba ka la pynlong ïa ka jingjurip bniah ïa ki sawdong sawkun jong ka Wah Myntdu ha Jowai.
Ha ka jingjurip, ka seng ka la lap ba don bun tylli ki nala kiba tuid sha ka Wah Myntdu, kiba kitlang ïa ki ñiut bad ki plastic. Ka la lap ruh ba ki filter ne kiba la tip kum ki In-Situ Nala, kiba la shna lyngba ka JMB ki la dap da ki ñiut bad katkum ka jinglap jong ka seng ba ym shym la pynkhuid ïa ki la bun snem, namar ym don ki nongtrei ba la buh kyrpang ban pynkhuid ïa ki.
Ka ARM ka la ong ba ka jingbym sumar bad pynkhuid ïa kine ki Nala ka buh jingma ïa ka Wah Myntdu bad ki jingim kiba im haka wah, kumjuh ruh ïa ki paidbah ka Jowai kiba shaniah ïa ka wah ha ki kam bapher bapher.
U President ka ARM, ula kyntu ba dei ban pynkhuid noh mardor ïa kine ki filter ne ki In-Situ Nala, khnang ban ïada ïa ka Wah Myntdu na ka jingjaboh bad ban ïada ïa ki paidbah na ki jingpang.
Ka kynhun kala kyntu ruh ïa tnat sorkar ba dei peit ban pynlong ki prokram ai jingtip halor ka jingkhuid bad ka jingleh khuid, khnang ban pynsngewthuh ïa ki paidbah ïa ka jingdonkam ban ïada ïa ka mariang.