La ar bnai khlem ïoh ban sam ïa u khaw ration sha ki paidbah ka West Khasi Hills District

Nongstoiñ, Nailur 14: Ka Hynñiewtrep Youths Council HYC West Khasi Hills District, mynta ka sngi 14 tarik Nailur 2026 hapoh ka jingïalam u samla Lumlang Kharsyiemlieh President bad ki para dkhot, ka la ïoh ban ïakynduh ïa ka Deputy Commissioner West Khasi Hills District, halor ka jingslem ban sam ïa u khaw ration kaba la long kumba ar bnai ei ei mynta.
Une khaw ration u dei u ba kynthup naduh u khaw NFSA (PHH and AAY) bad Non NFSA. Halor kane ka seng ka kyrpad ïa ka DC ban ïarap turklar lem khnang ba ki paitbah ki duk ki suk kin ïoh noh ïa ka hok.
Na ka liang ka seng hadien ba la ïatai bad ka DC, ka madam Hema Nayak ka la ïathuh ba jingeh jong ki halor kane ka dei ba ka shnong Pyndengrei kam shah shuh ban rung ki kali heh hapoh FCI.
Na ka liang u samla Lumlang Kharsyiemlieh haba ïakren bad ki lad pathai khubor, u la ong ba ka seng kam kwah ban tuklar ïa ka jingïadei ka Office FCI lane DC Office bad ka shnong. Hynrei ka HYC ka kwah ba ki khaw ration ki dei ban poi ha ki paitbah ka West Khasi Hills District.
U la ong ruh ba na ka liang ka DC ka la ong ban wad ki lad ki lynti ban pynpoi sha ki paitbah. Kan ïatai bad ki wholesale bad ban wad ki Temporary Godown tang ban bit biang ki paitbah. Katba ka seng ka la ban jur ba ki Nongwest bun kiba ap jingkyrshan na u khaw Ration, kumta hap ban shimkhia ban weng ïa ki jingeh ki paitbah.