Wer u Myntri Rangbah ïa ki nongwankai bad paidbah ban wan mad ïa ki jingbam ba shet ha jaka thymmai

Shillong, Nailur 14 : U Myntri Rangbah ka Jylla u Conrad K Sangma ha ka sngi Nyngkong u la wer ïa ki paidbah kynthup naduh ki samla pule, ki nongjngohkai pyrthei bad ki nongshong shnong ka jylla ba ki dei ban wan ban mad ïa ki jingbam ba die ha ka jaka thymmai ba la pynkhreh kyrpang na ka bynta ki nongdie madan.
Ïa kane u la ong haba kren ha ka jingïalang sam ïa ki song jingkyrshan pisa ne cheque sha ki katto katne ngut ki nogndie madan kiba shong die jingdie ha Brightwell Campus Hawkers Market bad ha SMB Parking Lot, Dhankheti.
“Ka jingwan jong ki paidbah ban wan mad ïa ki marbam ba die ha kine ki jaka kan long ruh ka jingkyrshan ïaki para nong shong shnong ha ka kamai kajih,” u la ong.
Ha kane ka sngi la don lang u Myntri Sorkar ka jylla u Bah Sanbor Shullai bad MLA ka East Shillong constituency ka Kong Ampareen Lyngdoh, CEO ka Shillong Municipal Board nalor kiwei kiwei ki heh Sorkar.
Baroh ki nongdie jingdie madan kin ïoh mar 20,000 ha kaba na kane 10,000 kila ïoh mynta ka sngi bad kin sa ïoh biang sa mar 2000 naka bynta 5 bnai lyngba ka skhim CM Urban Livelihood Grant.
Haba kren shaki nongdie jingdie madan, u Myntri Rangbah ula ai khublei ïaki daka ba ong ba ka jingiatreilang jong ki kala wanrah ïa u soh ka jingjop ha kaba ka Sorkar kala lah ban pynkylluid ïa ki surok, ki lynti ïaid kjat bad ki rud surok jong ka nongbah Shillong.
U Myntri Rangbah ula ong ba ka Sorkar ka buh hakhmat eh ïa ka ïoh ka kot, ka kamai ka jih jong ki nong shong shnong bad dei namar kane ka Sorkar ka kloi ban wad ki jaka thymmai ban ailad ïa ki nongdie jingdie madan ban bteng ia ka kamai kajih.