Shillong, Nailur 14: Ka la don ka jingkylla ha ka result jong ka jingïalehkai hapdeng ka Shillong Lajong pyrshah ïa ka Sawmer ha ka lympung Shillong Premier League 2026 kaba la long ha ka sngi Saitjaiñ.
Ha ka jingïakhun, ka Lajong ka la mad ïa ka jingjop da 6-1 kol, hynrei ka Sawmer ka la pyrshah ïa ka jingmih madan jong katto katne ki nongïalehkai kiba ka Lajong ka la pyndonkam na ka bynta kane ka jingïakhun.
Kumta na ka liang jong ka Shillong Sports Association Tournament Committee ka la shong jingïalang hynne ka sngi ban bishar halor kane ka kam.
Ka jingpyrshah ka dei halor ka jingkynnoh ba ka Lajong ka la pynïalehkai ïa lai ngut ki nongïalehkai ki bym dei ki trai jylla Meghalaya ha ka por ba ïalehkai. Ki nongmihkhmat jong baroh ar tylli ki klob ki la don lang hynne ka sngi bad la ailad kylluid ïa ki ban pynsngew ïa la ki jong ki mukotduma.
Hadien ba la sngap ïa baroh arliang mamla bad hadien ba la bishar bñiah ïa baroh ki kot ki sla bad ki jingbthah kiba ïadei, ka Committee da kawei ka sur ka la rai ba ka Shillong Lajong ka la pynkheiñ ïa ka Rule 9 jong ki kyndon jong ka SPL, kaba kdew shai ba “Tang arngut ki nongïalehkai na shabar ka Meghalaya la shah ha ka kynhun ïalehkai ki 11 ngut (Playing eleven)”.
Kumta, ka jingïalehkai kan ïeng ha ka jingshah rem jong ka Lajong bad ka Sawmer kan ïoh ïa ka jingjop kaba da 3-0 kol. Ha ka jingpynbna jong ka SSA, kaba la pynmih da u Assistant General Secretary u Samran Syiem, ka la kyntu ruh ïa baroh ki klob kiba la ïasoh, ba kin bud ryntih ïa ki jingbthah bad ki kyndon kumba la pynphriang da ka SSA.
Baroh ka paw ba ka dei ka jingbakla na ka liang ki nongpynïaid ka Lajong. Ka SLFC ka la sdang ïa ka jingïalehkai da u Lakpa Lama kum u rangap-kol bad ka la kum klet ïa u bad ka la pynrung sa arngut ki nongïalehkai bym dei trai ri, u Lalmuansanga bad u Abelson Jachi kum ki nongbujli.
Kane ka resol ka don ka jingktah kaba khraw ha ka jingïakhun ïaknieh nam lahduh jong ka SPL. Ka Lajong ka dang ïai bteng ban lamkhmat da 11 poiñ na ki hynriew tylli ki jingïalehkai, hynrei ka Mawlai kaba kamai 10 poiñ na ki saw tylli ki jingïakhun, ka don ha ka kyrdan kaba hakhmat eh ban kurup biang ïa ka kyrdan ba nyngkong. Ka Sawmer ruh ka kiew na ka kyrdan kaba hynñiew sha ka kyrdan kaba saw, bad mynta ka la khur 9 point. Ka ïaryngkat bad ka Langsning (kaba bat ïa ka nam lahduh) hynrei ka Langsning ka don ïa ka rekod jingjop ha ka jingïalehkai ba ki ïakynduh pyrshah (head-to-head advantage).
Ka jingïakhun kaba bud kan long ha ka sngi Balang ha ka por 5 baje janmiet hapdeng ka Mawlai pyrshah ïa ka Langsning. Kane kan long kawei pat ka jingïakhun kaba lah ban don bynta ban rai ïa ka nam lahduh jong ka SPL mynta u snem.
