Kynnoh ka JSU ba leh shilliang khmat ka Sorkar halor ka jingbhah ïa ki College pule Doktor

Shillong, Nailur 13 : Ka Jaintia Student Union (JSU) ka la kynnoh ba ka don ka jingleh shilliang khmat ha ka jingjied ne bhah ïa ki College pule doktor namar ïa ki samla pule ba ïoh ïa ki marks ba heh la phah sha ki College ki bym da paw katba ïa kiba rit ki marks la phah sha ki college kiba pawnam bha.
Ha ka jingpyllait khubor ha ka Sngi Saitjain, u Education Secretary ka JS u samla Bocheru Mi Pohsnem u la ong kane ka rukom bhah ïa ki college ka long kaba leh shilliang palat bad ka bym don shuh ka jingpyrkhat na ka bynta kito ki samla kiba la ïoh heh bha ki marks bad la shu pynlong kam kai ïa kane ka kam.
Ka JSU ka pynkynmaw ruh ba hadien ka jingtuklar jongka ha u snem ba la dep ha kaba kito ki samla pule kiba ïoh ïa ki mark kiba heh ki la ïoh rung ha ka Open Category, na ka liang ka tnad ka koit ka khiah ka la dep kular ban kynthup ïa ki seng ki samla pule ha ka jingjied ïa ki college bad kumjuh ruh ban thaw ïa ka Standard Operating Procedure kaba thymmai ban jied da ka jingkhuid jingsuba ïa ki samla pule ban leit pule ha ki college bapher bapher.
“ Ngi la phah ruh ïa ki jingai jingmut ba bun na ka bynta ka bha ka miat ki samla pule. Hynrei wat hadien ki jingïai buddien na ka por sha ka por ka tnad kam shym la lah ban leh ïa kaei kaba ka la kular bad ban thaw ruh ïa ka SOP ba thymmai. Ban da dei ba ka burom ïa kaei kaba ka la khlei bad kular kine ki kynrum kynram ba mynta ka kynti ki la dei ban lait noh” ong ka JSU.
Ka JSU ka la ong ba ka tnad pule puthi jongka seng ka la bud dien bad dawa ban don ka jingïakynduh bad ki heh jongka tnad ka koit ka khiah ha ka Lah Sngi U Blei ban dawa pynshai bad pynbeit mar mar ïa kane ka kam leh shillilang khmat.
Ka Seng ka khot bad ïawer ruh ïa ki samla pule bad ki kmie ki kpa jongki ban pyntip sha ka Seng lada ki ïakynduh ïa kiba kum kitei ki jingeh.
“ Lada phi mad ne ïa kynduh ïa kino kino ki jingleh shiliang khmat ha kaba bhah ïa ki college leit pule doktor wat hadien ba la ïoh ïa ki mark kiba heh ruh, sngewbha pyntip sha ka seng khnang ba ka seng kan ïoh ban ïakren ïa pynbeit bad ka tnad ka koit ka khiah ha ka Lah Sngi U Blei hi” ong ka kyrwoh.
ïa kine ki jingeh ba phi ïakynduh phi lah ban phah sha ka JSU Education Cell helpline 7005527646, 9856130842.