Mairang, Nailur 13: Wat la ka sorkar pdeng lyngba ka Election Commission jong ka ri kam shym pat la pynbna ïa ka tarik ban pynlong ïa ka MP Election shiteng samoi hynrei ki artylli ki Seng saiñ pyrthei kata ka National Peoples Party kaba ïalam ïa ka sorkar bad ka Voice of the Peoples Party kaba don ha ka liang pyrshah kiba la don ïa ki kyrtong kiba thikna ki ban mih madan ban ïakhun ïa katei ka election shiteng samoi ki la nangïaid shakhmat ban pynpoi ha ki ïew ki hat bad ki shnong ban pan ïa ka jingkyrshan na ki paitbah.
Ha ka jingpyrshang ban twad jingmut na ki paitbah nongshong shnong ka Eatern West Khasi Hills District ha kine ki sngi ki la pynpaw ba na ki arngut ki kyrtong kata u Dr. DRL Nonglait uba dei na ka NPP bad u Dr Batskhem Marboh jong ka VPP ki kham noh mynsiem sha u Dr. Nonglait.
Bun ki nongshong shnong kiba la pynpaw ba kim dei satia ki nongkyrshan jong ka NPP hynrei ki ai pat ka jingkyrshan ïa u Dr. Nonglait namar ba ki la ithuh ithaw bad ki don ka jingsngew jan namar ba u dei uba la pynheh pynsan ha West Khasi Hills.
Ki don pat kiba ong ba wat la u Dr.Nonglait u dei u kyrtong ka NPP hynrei ka jinglong shisur bad ka jinglah jong u ban shah ïa ka jingkynthoh jong kiwei khlem da pynphai nia wat tang khyndiat ruh ka pynlong ïa ki ba kin sngewieit ïa katei ka jinglong.
Haba kylli pat shaphang u Dr.Batskhem Marboh kyrtong ka VPP ki la ong ba haba ki sngap bad bishar ïa ka jinglong bad ki jingkren ha ki jingïalang bapher bapher ki jingkynthoh, jingkynnoh bad jingbeiñ ïa kiwei ka dei kaba hakhmat eh bad kaba ki sngewlyngoh eh ka long ba ka jingkren jong u bad ki para nongïalam ka party ka pyni ba kiwei ki dei ki bym biang suda hynrei ma ki kiba biang lut, lah lut nadong shadong dei tang ma ki katba kawei pa kawei ka kam ba ki leh kam ju poi sha ka thong.
Haba pyrshang ban ïakren bad ki riew rangbah kum ki nongïalam shnong, ki nongïalam balang bad kiwei kiwei ki la ong ba ki nongshong shnong ka Eastrern West Khasi ki dei ki briew kiba bun kam bha ha ka rep ka riang, ka khaï ka pateng hynrei ha ki por election ki pyndep hok ïa la ka kamram ban leit thep vote tangba kim ju ïawer ïa kiwei ban bud ïa uba ki mon ma ki ban jied hynrtei ki ïaid hala ka jong ka jong ka lynti bad wat ki nongïalam jong ki seng saiñpyrthei ruh kim tip satia la ki bud ne em ïa u kyrtong jong ka party ba ki ïalam.
Ha kajuh ka por ki la ong ba ha ki shong kiba hap ha ka thain Mairang naduh Langstiehrim, Mairangbah, Pyndengmumïong, Pungsañiang, Mawsawa, Sangshong, Lumsohkhlur bad Mission ha kane ka MP election shiteng samoi te ka lyer ka kham beh sha u Dr.DRL Nonglait bad wat ha ka constituency hi ruh ka long hi kumta bad ki don ka jingkyrmen ba lada kam don kano kano ka jingkylla ha Mairang constituency u Dr. Nonglait u lah ban jop.
