Jowai, Nailur 13: Ka Dkhiah West SCSO bad ka Cham Cham SCSC ki la pynthikna ïa la ka jong ka jaka ha ka phainal jong ka lympung phutbol Second bad Third Division 2026 bala pynïaid daka East Jaiñtia Hills District Football Association (EJHDFA), da kaba jop ïa la ki jong ki jingïakhun semi final ha ka sngi Saitjaiñ (12 tarik u Nailur, 2026) ha madan Artificial Ground Diengshynrum, Khliehriat.
Haba phai sha ka Semi Final jong ka Second Division ka Dkhiah West SCSO ka la pynliem noh da 1-0 kol ïaka Khliehriat West FC ban rung sha ka phainal. Ka shi kol ba la thep da u Nevermind Kya (42’) ka la paw ba ka la biang ïa ka Dkhiah West ba kan khur ïa ka jingjop.
Katba ka Semi Final jong ka kyrdan Third Division, ka Cham Cham SCSC kala jop suk da 5-0 pyrshah ïaka Moonongtdu SC. U Raymon Phawa (10, 27 & 64’) u la long u namtam jong ka Cham Cham SCSC, da kaba thep hat trick, katba u Monmi Dkhar (72 & 80+1’) u la pynkhihjar ar sien.
Da kane ka jingjop, baroh ar kin ïoh ïa ka lad ban ïakhun na ka bynta ka khusnam lahduh ha ka kyrdan 2nd Division bad 3rd Division.
