Khmih lynti u Lamphang ban plie ïa ka ïingdorbar thaw-aiñ hapdeng jong u bnai Naiwieng

Shillong, Nailur 10: U Lamphang ka Ïing Dorbar Thawaiñ ka Jylla Meghalaya u Thomas A. Sangma ha ka sngi Palei u la ong ba ka jingtei ïa ka ïing dorbar thymmai ka dang ïaid shakhmat bad la khmih lynti ba kan long kaba la khreh ban plie noh hapoh ka shiteng jong u bnai Naiwieng.
Haba kren sha ki nongthoh khubor, u Sangma u la ong ba ka por ba la ai sha ka tnad pyntreikam ka long ha ka 31 tarik u Risaw, hynrei ka sorkar ka kyrmen ban pyndep ïa kane ka projek ha ka shiteng jong u bnai Naiwieng.U la ong ba u la jurip hi dalade ïa katei ka jaka ban peit ïa ka jinglong jingman shwa ban leit jngoh ïa ka CPA.
Ha ka jingiakynduh jong u dang shen bad u Union Tribal Affairs Minister u Jual Oram, u Sangma u la ong ba ka sorkar kmie mynta kam lah ban mang ia ka pisa na ka bynta kaba ar namar ka jingkylla ha ki kyndon.U la ong ba la ai jingmut ïa ka ïing dorbar ba kan leit sha ka ophis jong u Lamphang ka Parliament ban ioh jingmut halor ka Ministry ne tnad kaba biang.
U Sangma u la ong ba kam don kano kano ka jingkiew ha ka jinglut jong ka projek, watla kan donkam ban pynlut shuh shuh na ka bynta ka IT, ICT bad ki jingtei ba pahara.
U la pynpaw ka jingkyrmen ba katei ka ïing kan long kaba la pynkhreh na ka bynta ka dorbar thawain ka jylla ban wan ha u snem thymmai.