Nalor u surok ba la ïong ngaiñ, ai ksai ban pynurlong ïa ka C&RD Block haba leit ïalap elekshon ha Umden

Nongpoh, Nailur 08: Ki heh nongïalam ka NPP naduh u Bah Prestone Tynsong, ba dei ruh u Symbud Myntri Rangbah ka jylla, u Bah Sosthenes Sohtun MLA ka NPP na Jirang ba dei ruh u myntri sorkar, ka kong Rona Khymdeit MDC ka Nongpoh lem bad kiwei kiwei ki heh nongïalam ka party mynta ka sngi kila hiar ha ka shnong Umden ban leit ïalap elekshon naka bynta u kyrtong ka party NPP u Dr DRL Nonglait.
Ha kane ka sngi da ki hajar ngut ki paidbah kila tuid sha madan Umden ban sngap ïaka jingïalap elekshon ki heh nongïalam ka party NPP naka bynta ka elekshon MP shiteng samoi ban wan ban pan ka jingkyrshan naki paidbah.
Ha kane ka sngi na ka liang ki nongkren naduh u Bah Sosthenes, ka Kong Rona bad u Dr DRL Nonglait kila ai ka jingïaroh ïa kane ka sorkar MDA II bala lamkhmat da ka NPP kaba la leh shibun kiei kiei ban kyntiew ïaka jylla bad khamtam ban wanrah ki kam pynroi bapher bapher wat ha Nongpoh Constituency kaba don ruh ïa u MLA na ka party UDP, naduh ki surok, ki jaka pule, ki jaka lehkai bad kiwei kiwei.
Kila ong ruh ba ka sorkar kala ïaleh katba lah ban wanrah ki jingmyntoi ha ka jylla, ki bym lah shuh ban ñiew kaba long ka jingkyrkhu kaba khraw ïaki paidbah da kaba ïaroh ruh ba dei kane ka party kaba la nud ruh ban shim ki sienjam kiba tyngeh khamtam ka jingmynjur jong ka kynhun ki nongmihkhmat ha iing Dorbar ban pyndam ïaka jingtih Uranium, ban pynlong ktien sorkar ïaka ktien khasi bad garo, bad ruh ban pynurlong ïaka ILP kaba dei kawei naki mat dawa ki kynhun seng bhalang bapher bapher haka jylla.
U Bah Prestone Tynsong kum uwei naki nongïalam ka party bala kham rangbah ruh haka politik u la ong ba ka thaiñ Umden ka dei shisha kaba la kyrkhu naduh u surok ba dei u budlum ka roi ka par kaba ki paidbah mynshuwa ki sohsat bad syrtok haka leit ka wan hynrei mynta la aram jai namar ba u surok u la iong ngaiñ bad kane baroh ka urlong dei namar ka jingiohi jngai ki nongïalam jong ka party NPP nalor kiwei kiwei ki kam pynroi bala theh ha Nongpoh Constituency.
“Ma phi kiba la ioh pdiang ïaka jingkyrkhu wat klet ïangi shiteng por” la ong u Bah Prestone habaa kren ha kane ka sngi ban pan ka jingkyrshan ba radbah naki paidbah da kaba ai ksai ruh ban pynurlong sa kawei ka mat dawa ki kynhun na ka thaiñ Umden ban pynurlong noh ïaka C&RD Block ha kaba ka sorkar kan sa shong bishar bha ban pynurlong noh ïa kane namar ka jingdonkam shisha ki paidbah ban pynjan ïaki jaka treikam ka sorkar.