Pyndem ka Amrit ha ka HYC-Narpuh, kular ai kam ïa ka longkmie bad ban ai jaka sah ïa ki nongtrei trai muluk

Khliehriat, Nailur 07 : Ki nongïalam bad ki dkhot jong ka Hynñiewtrep Youth Council Narpuh Circle ba la lam khmat da u President u bah Kitdorlang Mukhim bad u General Secretary u bah Laskyboy Rymbai, mynta ka sngi ki la leit hiar sha ka company Amrit Cement kaba don ha Umlaper, East Jaiñtia Hills District bad ki la iakren bad u heh jong ka company Amrit halor ki kam kiba ïadei bad ka jingbit jingbiang ki briew ka thaiñ.
Hadien ka jingiakren bad ki nongialam ka HYC Narpuh Circle, u Manager jong ka Amrit, u Amit Kumar Singh u la kular ban shim khia, kawei na ki mat ba ka seng ka la leit tuklar ka dei halor ka jingkular ka company ban thungkam ïa kawei ka briew kaba na ka thaiñ Narpuh kaba na ka longïing kaba duk bad halor kane ka company ka la shu butheng bad kular thok man ka por, hynrei da ka jingleit tuklar ka seng, u Manager ka Amrit u la ai da ka jingthoh sa u bah Ros Huwa uba dei u kpa jong ka longkmie kaba wad kam ha Amrit, kaba na shong Musianglamare (New) bad lyngba ka jingthoh ba la ai ha u paieid Ros la pynpaw ba ka company ka la pan por 15 haduh 20 sngi ban pynurlong ïa kane ka jingthungkam bad ka seng ka dang ap ïa kane ka jingpan por ka company.
Na ka liang u paieid Ros Huwa, uba la leit hiar lang bad ki dkhot ka seng sha company Amrit, u la pynpaw ka jingsngew nguh bad ai khublei ïa ka seng HYC-Narpuh kaba la shimkhia ban tuklar lem ïa kane ka kam ba ïadei bad ka thungkam thungjam ha kaba ka company ka la kular ban ai kam ïa ka khun, u la pynpaw ruh da kaba ong ba “La kumno kumno katkum ka jingkular ka company hakhmat jong ki nongïalam bad ki dkhot ka HYC Narpuh kine baroh nga kyrmen skhem ba kin urlong bad nga khmihlynti bad kiei kiei baroh kin iaid beit, namar ka company ka la shu kular thok mynta la ar snem tam ban ai kam ïa ka khun, ma nga kum u riew tymmen haba nga wan ha company ki heh ka company pat ki la shu ong ïa nga ban wan mih lashai bad kumne shi kumne ka jia, hadien kata ngam banse ban khot ïa kine ki paralok ban iarap lem, nga ainguh ïa u Blei ba mynta ka sngi ka company ruh ka la kular bad ai da ka jingthoh”
Katkum ka jingthoh ba la soi da u Manager jong ka Amrit la ong ba yn sa shimkhia ban ai kam ïa ka khun u paieid Ros Huwa bad kane kan shimpor 15 haduh 20 sngi.
Na ka liang u u President ka HYC Narpuh Circle, u la iathuh ba u paieid Ros Huwa, u la ujor sha ka seng bad u la pan ka jingiarap na ka seng ban leit tular lem ïa ka jingbym lah ban ai kam ka company Amrit kaba la kular ban ai kam ïa ka khun jong u bad kumta ka seng ruh ka la pdiang ïa ka jingkyrpad bad ka la leit ban iakren bad ki heh ka Amrit Cement mynta ka sngi bad u la ong “Ngi na ka seng ngi pynrem ïa kane ka jingleh ka Amrit Cement kaba long kum ka jingpynbiej ïa ki briew bad na ka liang ka seng kan nym ailad ïa kiba kum kine ki jingpynbiej ïa ki briew jong ngi bad nangne shakhmat ngin hiar sa sha kiwei kiwei ki company ruh lada don kum kine ki jingjia bad ka seng kan shimkhia ruh ba kam dei ban don ka jingshah pynbiej ki briew jong ngi”
Ha kaba ïadei bad ka jingbym lah ban ai jaka sah ne quarter ïa ki nongtrei kiba dei ki trai muluk, u General Secretary ka HYC Narpuh Circle, u bah Laskyboy Rymbai u la pynpaw da kaba tyngeh hakhmat u Manager ka company Amrit bad ong ba ki don u nongtrei uba dei na elaka Narpuh bad uba na jngai shnong uba la trei bad ka Amrit mynta la kumba khatsan snem hynrei u hap ban shu sah wai shabar ka company bad u hap ban siew bai wai man u bnai, katba ïa ki nongtrei kiba dei na kiwei pat ki jylla ki ioh ïa ka jaka sah ne ki ioh ïa ki quarter hapoh company, kumta u la kyntu jur ïa ka company ba ka dei ban pyrkhat ban ai jaka sah ban ai da ka quarter ïa ki nongtrei kiba dei ki trai jylla kiba jngai shnong khnang ba kin lait na ka shong ïingwai.
Ki nongïalam jong ka seng ki la pynpaw ba kin nang iai buddien ïa kine ki jingkular ka Company Amrit.