Ki nonghikai ki long ki Nongpyn-wandur bad Nongtei ïa ka imlang sahlang lyngba ki khynnah skul: DC

Mawkyrwat, ‘Nailur 07: Ban kynmaw burom ïa ka sngi kha jong u Dr. Sarvepalli Radhakrishnan, uba long u President ba-ar jong ka Ri India bad uba long ruh u philosopher, scholar bad nonghikai ba pawnam, ka ophis jong ka District School Education Officer, South West Khasi Hills District la pynlong ïa ka jingrakhe ïa ka Sngi burom ki Nonghikai kaba 65, ne ka 65th Teachers Day hapoh PHE Office Hall, Mawkyrwat, South West Khasi Hills District.
Ha kane ka sngi kyrpang, ka kong A.L. Mawlong, IAS, Deputy Commissioner, South West Khasi Hills District, Mawkyrwat, ka la long kum ka Kongsan bad u bah K. Nongbsaw, Executive Engineer, PHE Mawkyrwat Division kum u Symbud Kongsan ha ryngkat ka jingdonlang ka kong R. Sohkhlet, District School Education Officer, South West Khasi Hills District, ki khynnah skul lem bad ki nonghikai.
Haba ai jingkren ha ka jingïalang jong ka jingrakhe ïa ka 65th Teachers’ Day Celebration, ka Kong A.L. Mawlong, IAS, Deputy Commissioner, South West Khasi Hills District ka la pynpaw ka jingaikhublei ba kyrpang na ka bynta baroh ki nonghikai hapoh jong ka South West Khasi Hills District namar ki long ki rishot kiba kongsan jong ki nonghikai ha ka jinghikai, jingkdew lynti ne ïalam bad pynwandur ïa ka lawei jong ki khynnah skul.
Ym tangkata, ka la pynpaw ruh ka jingkhublei ïa ki nonghikai namar ka jingaiti lut, ka jingtrei shitom bad ki jinglen lade jong ki ban shakri ïa ki khynnah pule ha ki jaka bapher bapher la ki long kiba hajan ne wat kito ki nonghikai kiba la hap ban sah ha ki jaka ba khamjngai. Ka la ong ruh ba ka kam hikai ka long kawei na ki kamram kiba don burom tam, da kaba pynpaw ba bunsien ki nonghikai ki buh shuwa ïa ka jingdonkam bad ka bha ka miat jong ki khynnah pule ban ïa ka jingdonkam jong ki hi.
Ka kong Mawlong, ka la ong ruh ba ka bynta jong ki nonghikai kam kut tang ha ki kot pule bad ki jinghikai kiba ïadei bad ka jingpule, hynrei ki nonghikai ruh ha bynta jong ka jingïatei bad pynsan ïa ki jingmut jingpyrkhat jong ki khynnah, ban pynroi ïa ki sap ba rieh jong ki, ki tei ïa ka jinglong briew bad ki pynrung ha ki ïa ki dor kiba kongsan kum ka jingïaid ha ka lynti kaba dei, ka jingminot, ka jinglah ban ïeng skhem hapdeng ki jingeh, ki jingjynjar ba ki ki ïa kynduh namar ki don ha ki ïa ka jingkitkhlieh. “Da ka jingïalam bad kdew lynti jong ki nonghikai ba ki khynnah pule ki ïoh jingtip ïa kaei kaba dei ban pule, bad ki nang ruh kumno ban pyrkhat, ban ïakhun ïa ki jingeh, ban ïeng skhem haba ki kyllon bad ban leh donakor ha kiei kiei baroh”, ka la ong.
Shuh shuh ka la ong ruh ba ki nonghikai ki long ruh kum ki “nongpynwandur bad nongtei ïa ka imlang sahlang”. Ka la kdew ruh ba bun na ki briew kiba la poi sha ki kyrdan kiba khraw ha ka imlang sahlang, ki dei ki briew kiba la ïoh jinghikai na ka jingïalam, jingpynshlur bad jingshaniah jong ki lyngba ki nonghikai jong ki.
Haba ka kynmaw ïa ki sngi ba kyrpang jong ki nonghikai, ka Kong Mawlong ka la ïathuh ba ka jingshaniah bad jingsngewskhem kiba la pyni da ki nonghikai ki la long ka jingai mynsiem bad jingpynshlur ïa kiba bun. Ka la ong ba watla ki khynnah pule ki lah ban klet noh ïa katto katne ki jinghikai na ki kot pule, hynrei kim dei ban klet pat ïa ka jingieit, ka jingpynshlur bad ka jingshaniah kaba ki nonghikai ki la buh ha ki.
aba kren ai mynsiem na ka bynta ki khynnah pule pat, ka Kong Mawlong ka la kyntu ïa ki ban sngewthuh bha ïa ka jingmut kaba shisha jong ka ‘Teachers’ Day’ bad ban ai burom bad jingsngewnguh ïa ka jingïalam ne pyni lynti bad ki jinglen lade jong ki nonghikai ha ki por baroh. Ka la ong ba ka jingai kaba khraw tam kaba ki khynnah pule ki lah ban ai sha ki nonghikai kam dei tang ka jingïarap, ka khusnam ne ka jingai sngewbha sha ki, hynrei ka long ban ïoh jong ki ban jop ha ka jingim, ban long ki nongshong shnong kiba don ka jingkitkhlieh, ban burom ïa kiwei bad ban san long ki briew kiba bha.
Ka la kyntu ruh ïa ki khynnah pule ban ai burom ïa ki nonghikai man la ka sngi da kaba sngap bha ha klas, shahshkor bad pynleit ïa ki jingmut jingpyrkhat bad jingkyntu jong ki, burom ïa ki bad pyndonkam hok ïa ki lad ki lynti ba la kdew da ki nonghikai.
Ha kaba pynpaw ïa ka jingsngewnguh ïa baroh ki nonghikai bad ki nongai jinghikai kiba la noh synñiang bakhraw sha ka imlang sahlang, ka kong Mawlong ka la ong ba watla ka jingtrei shitom jong ki nonghikai kam ju ïoh jingïaroh ne jingithuh ha kiba bun ki bynta hynrei kim dei ban noh mynsiem pynban kin dang ïai bteng ban trei da kaba pynwandur ïa ka longbriew manbriew jong ki khynnah skul bad ïa ka imlang sahlang na kawei ka pateng sha kawei pat.
Ha kane ka sngi, ka Kong Mawlong ka la ai khublei kyrpang ruh ïa ki nonghikai kiba la ïoh ïa ki Teachers’ Day Awards, kata u Kaldinus Marbaniang, Assistant Teacher, Nativity Higher Secondary School, Mawkyrwat, ka Kong Mira Kanti Rynjah, Assistant Teacher, Nongtynñiaw Deficit Upper Primary School bad ka Kong Daplyne Iawphniaw, Assistant Teacher, Mawksiar Lower Primary School, halor ka jingjop bad ka jingshakri kaba shitrhem jong ki ha ka liang ka pule puthi.
La pynïaid ïa ka program da ka kong Dianghun Warjri, Community Mobilizer Coordinator (SSA). Ka jingkren pdiang la ai da ka kong R. Sohkhlet, District School Education Officer, South West Khasi Hills District, bud sa ka jingrwai pdiang da ki khynnah skul jong ka Mawkyrwat Presbyterian Secondary School, ka jingshad da ki khynnah skul jong ka Nativity Higher Secondary School, Mawkyrwat, ka jingrwai ïa ka National Anthem na ki khynnah jong ka Maharam Government Higher Secondary School, Mawkyrwat bad ka jingkren khublei na u bah S.S. Lyngkhoi, Sub Divisional School Education Officer, South West Khasi Hills District.