Shimkhia u DC Ri-Bhoi ban ïatreilang bad ka NHAI bad NHIDCL ban weng ïaka jingeh ki nongñiah trok
Hadien ka jingai dorkhas ka MCTODA
Nongpoh, Nailur 03: Hadien ka jingeh bala mad da ka Meghalaya Commercial Trucks Owners and Drivers Association (MCTODA) bala pynsngew ruh sha ki bor district ka Ri-Bhoi lyngba ka dorkhas, u Deputy Commissioner ka Ri-Bhoi u Dr. Abhishek Saini u la kular ban shimkhia ïa katei ka kam khamtam hadien bala pynmih ïaka hukum bym shah ïaki trok bad ki kali heh ban ieng ha shilynter ka surok bah naka bynta ka jingshngaiñ jong ki paidbah ba leit ba wan.
Haba kren sha ki lad pathai khubor naka liang u Dr. Abhishek Saini u la ong ba “ngi la iohpdiang ïaka dorkhas jong ka MCTODA bad ngi don ruh ka District Road Safety Committee bala ju pynlong ïaki jingïalang bad ki jingïakynduh bapher bapher naka bynta ban weng ïaki jingeh ha shilynter ka surok bah National Highway 6, bad naka liang ka MCTODA kala kyrpad ruh ban don noh ki jaka ieng bad shong jahthaid ki nongñiah trok kum ki Lay-by ne ki parking bay haki rud surok namar ka jingbym ioh jaka ieng shuh ki trok haki rud surok naka bynta ka jingshngaiñ jong ki paidbah ba leit ba wan.
Naka liang u DC ka Ri-Bhoi u la pyntip ba ka bor district kala shimkhia ïa kane ka kam bad mynta ngi dang wad ïaki jaka haka jingïatreilang bad ka NHAI bad NHIDCL bad kumba la ju pynlong ïaka District Road Safety Meeting man ka por ha kane ka kynti ba mynta la thmu ruh ban khot lang ïaki nongïalam ka MCTODA ban don bynta lang ha kane ka komiti haka jingdonlang ki bor pulit, NHAI, NHIDCL bad ki bor district khnang ba yn lah ban weng ïaki jingeh bad ban ïathir ïaki sienjam ban lait na kano kano ka jingeh ha surok bah.
Hakajuh ka por naka liang u DC u la pyntip ruh ba naka liang ka bor district kala shim ïaka sienjam ban wad ki lad ki lynti ban weng ïa kane ka jingeh shipor ha kaba la kyrpad ïaki trai petrol pump ba kin shah katto katne tylli ki trok ban ieng, bad ha kaba ïadei bad ka No Entry haka jylla Assam naka liang u DC u la kyrpad ïa u DC Kamrup ba kin pynjlan ka por khyndiat khnang ba ki trok ki ioh ban rung bad ieng sha ki petrol pump shuwa ka por.