Jowai, Nailur 03: Ka Borkhat bad ka Dkhiah West ki la jop ïa la ki jong ki jingïakhun Quarter final ha ka Third bad Second Division 2026 bala pynïaid daka East Jaiñtia Hills District Football Association (EJHDFA), kiba la long hynne ka sngi Palei, 03 tarik u Nailur, 2026 ha madan Artificial Ground Diengshynrum, Khliehriat.
Haba phai sha ka Quarter Final jong ka 3rd Division, ka Borghat SCSC ka la pynliem noh ïa ka ka Tongseng Youth SYSC (FT) da 1-0 kol ban buh jaka ha ka semi final. ïa kane ka kol na ka bynta ka Borghat SCSC la thep da u Laxmon Kympad (65’).
Katba haka Quarter Final jong ka 2nd Division, hapdeng ka Dkhiah West SCSO pyrshah ïa ka Lama Youth SC (FT) ka la kut ha ka jingïakhaid khlem da don ba lah ban pynkhihjar, kaba pynlong ïa kine ki arliang ban rai da ka jingïashut tie breaker, ha kaba ka Dkhiah West SCSO ka la jop da 7-6 ban pynthikna ïa ka jaka ha ka semi final.
Hashwa kine, ka Cham Cham SCSC bad ka Moolamanoh SC kidei kiba nyngkong ban buh jaka ha ka semi final jong ka 3rd bad 2nd Division hadien ba ki la jop ïa la ki jong ki jingïakhun QF.
Ka Cham Cham SCSC ka la pynliem noh ïa ka Youth SC Pyrtakuna lyngba ka Tie-Breaker da 4-3 ha ka 3rd Division, katba ka Moolamanoh SC ka la jop pyrshah ïa ka Suchen Lumiarain SC da 2-0. ïa kine ki kol la thep da u Jespar Dkhar (15’) bad u Ambition Dkhar (77’).
Na ka bynta ka Borghat SCSC bad ka Cham Cham SCSC, ka jingïoh rung sha ka semi final ka la pynthikna ruh ïa ki ban shah kyntiew kyrdan sha ka 2nd Division ha ka samoi ban wan, kumjuh ruh ïa ka Dkhiah West SCSO bad ka Moolamanoh SC, ki la pynthikna ïalade ban kiew kyrdan sha ka 1st Division ha ka aiom ïalehkai ban wan.
