Dang trei shitom ki Sahep ban pyndep ïa ka SIR bad pynbeit ïa ki kyrteng ha ka thup ki nongthep vote

Nongpoh, Nailur 01: Ka jingpyndep ïaka Special Intensive Revision (SIR) ban pynbeit ïaki kyrteng haka thup ki nongthep vote kiba bakla bad donkam ban pynbeit ka dang ïaid shaphrang ha Ri-Bhoi District bad khmih lynti ba yn lah ban pyndep ïaka thup kyrteng ba khatduh shuwa ka por bala buh da ka Election Commission of India.
Kiba bun naki Polling Station kila don haka lynti ban pyndep ïa ki jingpynbeit bad ki jingbakla baroh da ka jingtrei shitom ki ophisar kiba dei khmih, ban pynthikna ba yn lah ban pyndep haka por ba biang bad naka liang u Additional Chief Electoral Officer ka jylla u la leit ban iuhkjat haki polling station bapher bapher ka Ri-Bhoi ban ïakren bad ki ophisar haki jaka bala pynlong ïaki jingpynsngew paidbah (hearing).
La kyrpad ruh ïaki paidbah ki bym pat dep ban pynbeit ba kin shimkhia ban pyndep noh kloi haka por bala buh, khnang ba yn lah ban pyndep haka por ba biang bad naka bynta ki jingtip ba bñiah bad jingpynshai shaphang ka SIR ki paidbah ki lah ban phone ha u number 9863985792.