Um ju shong ophis, ka kam pisa pilaiñ ruh um ju pynshai kynnoh ka SRSHNS

Mawkyrwat, Nailur 01: Ka Synjuk ki Rangbah Shnong Hima Nobosohphoh Syiemship (SRSHNS) ha ka 29 tarik u Nailar 2026 ki la pynlong ïa ka jingïalang ba kyrkieh ha Rangblang, South West Khasi Hills District ban pyrshah halor ka jingthung syiem biang jong ka District Council ïa u Kawangbor Syiemiong kum u Syiem ba pura ka Hima Nobosohsphoh Syiemship.
La kynnoh ruh ba ka jingbym shaniah shuh ki khun ki hajar ïa u Kawangbor Syiemiong ka long ba um shong thikna hapoh ka ophis syiem bad ha kaba ïadei bad ka kam pisa pilaiñ ruh um ju pynshai hapoh ka Dorbar Hima bad kaba kham kongsan eh ba kim sngewtynnad ïa u ka long namar um dei napoh ka hima.
Haba kren sha ki lad pathai khubor, hadien ka jingïalang na ka liang u bah Bokstone Thongni uba dei u Chairman ka synjuk u la ïathuh ba ka synjuk naduh ki por mynshwa ka la dep ban ujor ha ka Executive Committee barim hapoh ka jingïalam ka NPP halor ki hynñiew tylli ki mat pyrshah ïa u Kawangbor Syiemiong ha kaba ka EC kaba rim ka la sospon ne weng noh shipor ïa u na ka kam kum u syiem bad thung bujli da u Acting Syiem u Ferdinand Syiemiong.
Kumta, u la ong ba kaei kaba la pynkyndit ka long ba kane ka EC kaba mynta hapoh ka jingïalam ka VPP, khlem da bishar bniah ka la thung biang ïa u Kawangbor Syiemiong kum u Syiem ba pura ka hima Nobosohphoh ha kaba kane ka la pynlyngngoh ïa ki khun ki hajar jong ka Nobosohphoh Syiemship baroh kawei.
Ym tangkata, ha kane ka sngi la ïoh ruh ban ïakren bad arngut ki Lyngdoh ha kaba ki la pynpaw ïa ka jingbym sngewtynnad shuh jong ki ban ai ka kti jong ka jingïatreilang bad u syiem namar ki kam leh donbor jong u ha kaba u la weng jubor ïa u General Secretary khlem ka jingtip ki Lyngdoh bad u la weng ruh ïa u Lyngdoh ka Kur Paliar bad thung bujli pat da uwei.
Ki la ïathuh ruh ba kiba pyrshah ïa une u syiem ba mynta ki long na ki Lai lyngdoh, Thongni San Mat, ki Lai Kynja, ka Kur Paliar Markyrda bad ka Ïing Sad Kur Syiemiong ka ju ïai pyrshah ïa ka District Council halor kane.
Kumta na ka liang ka synjuk ka la rai ban phah jingthoh biang sha ka District Council ban kyrpad ba ka dei ban weng syiem noh mardor ïa u Kawangbor Syiemiong bad ban thung bujli noh da u Ferdinad Syiemiong uba dei u trai hima.