Haduh 666 tylli ki Aganwadi Centre ha jylla kiba treikam na ki ïingwai ki jingtei ba shipor ïathuh u Conrad

Shillong, Nailar 29: U Myntri Rangbah ka jylla u Conrad K Sangma ula ong ba haduh 666 tylli napdeng ki 6188 tylli ki Anganwandi Centre ha ka Jylla ki dang treikam na ki Ïingwai lane jingtei ba shipor bad ka Sorkar kam shym la pynlut ha ka ban pynbha ïa ki Ïing wai namar ka jingbym don jaka.
Haba jubab ïa ka jingkylli u MLA ka TMC u Dr Mizanur Rahman Kazi, u Conrad ula ïathuh ha Ïingdorbar Thaw Aiñ kaba dang shudep ba ka jingtei bad ka jingmaramot ïa 2,148 tylli ki centre la leh ryngkat bad ka Tnad Rural Development bad ka MGNREGS, bad T. 64 klur la mang hapoh ki Externally Aided Project.
“Na ki 2,148 tylli ki centre, 1,670 la dep ban pyntrei bad ïa kiba sah yn sa pyndep noh shen. Ngim shym la pynlut pisa ha ka ban pynbha ïa ki jingtei jong ki ïing ba shipor,” ïathuh shuh shuh u Myntri Rangbah.
Na ka liang jong u, ula ong ba ïa ka jingkyntiew kyrdan la leh hapoh ka Meghalaya Early Childhood Development Mission.
Halor ki jingbam tei met, u CM ula ong ba ïa ki supplementary nutrition la ai na ka bynta 25 sngi ha ka shi bnai- ki jingbam ba dang khluit ïa ki khynnah hapdeng ka rta 3-6 snem bad ka ration ba shisien shi taïew ïa ki khynnah ba 6 bnai haduh 3 snem, ki kynthei ba armet, ki kmie ba ai buiñ khun bad ki samla kynthei ba dang khie dang san.
Ka Jylla shen kan sa sam ïa ki pylleng kumba arsien ha ka shitaïew kum shibynta jong ki jingbam ba la shet bad ba dang khluit.
U Conrad u ïathuh ba la pynlong ruh ïa ki jingleit khmih man ka por bad ka social audit ban peit thuh ïa ka jingbha ka bam bad ka jingsam ha ka por kaba biang haba kyntu ïa ki MLA ba kin pynsngew lada don kino kino ki jingbym biang.
Haba kdew ïa ka jingkheiñ jong ka NFHS, ula ong ba ki khynnah ba pang swai hapoh 5 snem ka la hiar na ka 46% sha ka 35% ha kine ki lai snem bad ka jingpang swai kyllum lang ka la hiar sha ka 36%, ka jinghiar ba heh ban ïa ka national average.
“Ngi kwah ban pynhiar sha ka zero. Ngi la sdang pyntreikam ïa ka prokram 1000 sngi ba kynthup ïa ki khunlung naduh ba dang kha haduh ar snem,” ula ong haba bynrap ba baroh ki centre ki la don la ki jaka shet wat kim pat ïoh ïa ki kamra shet jingshet ba la shna la ka jong.