Shillong, Nailar 29 : Ym duna ïa ka 97,852 ngut ki samla pule kiba la ïoh ïa ka Chief Minister’s Scholarship Scheme jong u snem 2025-26, pyntip u Myntri ka tnat pule puthi u Bah Lahkmen Rymbui hapoh ka ïing Dorbar Thaw Aiñ.
Ha ka jubab jong ka jingkylli ba la wanrah da ka MLA ka Gambegre constituency Dr Mehtab Chandee A Sangma bad u MLA ka Mendipathar constituency Marthon J Sangma, u Bah Lahkmen u la ong ba ka Sorkar Jylla ka la lah ban weng bad pynbeit ïa ka jingeh jong ka jingpynslem ban pyllait ïa ka Scholarship jong ki samla pule ba hap haka thup Schedule Tribe ha u snem bala dep.
Haba pynshai halor ki lad ki lynti ba la shim ban pynthikna ban pyllait ha ka por kaba biang ïa ka Scholarship, u Myntri u la ong ba wat hapdeng ka jingpynslem ban ïoh ïa ka pisa na ka Sorkar Pdeng na ka bynta u snem pule 2024-25, hynrei ka Sorkar Jylla ka la pynthikna ba ki samla pule kiba hap haka thup ST kiba dei hok ban ïoh kim dei ban shah ktah.
“Ka Sorkar Jylla ka la pyllait lypa ïa pisa 236.0056 klur tyngka na ka bhah Sorkar Jylla bad ka la pyllait ïa ka Scholarship sha ki samla pule kiba dei hok, katba dang ap ban ïoh ïa ka bhah jong ka Sorkar Pdeng” la ong u Bah Lahkmen.
ïa ka pisa ba la mang lypa na ka Sorkar Jylla yn pynbeit hadien baka Jylla ka ïoh pdiang ïa ka bhah jong ka Sorkar Pdeng ynda la ïoh ïa ka pisa na ka Ministry of Tribal Affairs ka Sorkar Pdeng.
