Kumba 10-15 % ki dei ki Kmie ba don jingma bha bad bun ki dei kiba don jingpang duna snam: Conrad

Shillong, Nailar 29: U Myntri Rangbah ka Jylla u Conrad K Sangma ula ong ba un sa peit thuh hi dalade ïa ka jingwadbniah ba kyrpang halor ka jingdon bun ki kynthei armet ba pang anemia ne ka jingpang jingduna hemoglobin ha ka snam ha East Garo Hills.
Kane ka jingkular ka la mih hadien ba u Nongïalam ka Liang Pyrshah u Dr. Mukul Sangma uba la pynsngew ïa ka jingdon bun ki nongpang anaemia ha ka jingleit jngoh jong u ïa ki jaka sumar hapoh ka district, ha kaba bun ki kynthei la hap ban phah sumar shabar ka district.
Haba tuklar hapoh ka Ïingdorbar Thaw Aiñ, u Myntri Rangbah ula ong ba ka Sorkar ka la buddien ïa man ki kynthei ba armet hapoh ka Jylla lyngba ka software ha kine ki hynñiew snem ba la leit noh haba buhrieh ruh ïa ka kyrteng ban ithuh ïa ki nongpang kiba don jingma bha.
“Kumba 10-15 % ki dei ki Kmie kiba don jingma bha bad bun na ki, ki dei kiba pang duna snam. Ngi la don ïa ka jingkheiñ ha baroh kawei ka Jylla,” ong u Conrad haba bynrap ba ïa kum kine ki kmie la pynkynriah noh sha ki mother home 15 sngi shuwa ba kin kha bad ai ïa ka jingbam tei met bad ka jingkyrshan pisa ha ryngkat bad ki jingsumar kiba biang.
Haba pynpaw ba ki prokram ba la pynleit jingmut ha kane ka bynta ka la ïarap ban pynduna ïa ka jingïap ki Kmie ba kha khun da 55% ha kine ki hynñiew snem-ka jinghiar ba bun tam hapoh ka Ri, u Conrad ula ong, “Ngim kwah ba ki Kmie kin duh noh ïa la ka jingim haba wanrah jingim sha ka pyrthei. Ngan sa khmih hi shimet halor kane bad ngin sa leh ïa ka audit ba kyrpang bad sa shimkhia kyrpang ha EGH”.
Ha shuwa kane, u Dr. Mukul Sangma ula ong ba ka anaemia la sumar kum kiwei kiwei ki jingpang ha ki CHC bad PHC ki district bad ban jur ïa ka jingpynïasoh hapdeng ka jingbam tei met ïa ki longkmie bad ka jingpang ringswai jong ki khynnah, kumta u la kyntu ïa ka sorkar lyngba ka tnat ba kan shim khia bha ha kaba ïadei bad ka jingpang kaba la wan jia bha ha kane ka thaiñ bad kumjuh ruh kaba lah ban ktah ïa ka jylla baroh kawei.