Juriplang u Bah Sanbor bad Bah Paul ïa jaka jong ka Reid Provincial Chest Hospital

Shillong Nailar 29: U Myntri ka Sorkar Jylla u Bah Sanbor Shullai ryngkat bad u MLA ka Shillong West Constituency u Bah Paul Lyngdoh ha ka sngi Thohdieng, kila leit jurip ïa jaka jong ka Reid Provincial Chest Hospital, Upper Mawprem, na ka bynta ban shna noh ïa ka surok ban pynsuk ïa ka leit ka wan jong ki paitbah.
U Bah Sanbor Shullai bad u Bah Paul Lyngdoh kila lum ïa ka jingialang ha katei ka hospital ban ïatai sani bad ki heh ophisar ka tnad ka koit ka khiah bad PWD ryngkat ka jingdonlang ki nongialam shnong ka Mawbah bad Nongsohphoh ïa ka jingthmu ban shna ïa ka surok ha katei ka thaiñ.
“Ma nga bad u Bah Paul u MLA ka thaiñ ngi lah iakren man la ka por ïa ka jingdonkam ïa ka surok kaba heh ha kane ka thaiñ, khamtam haba ka surok ha Mawbah ka long kaba rit bha bad ha ki bynta kiba sharum jong kane ka surok ki don ki lum jingtep bad ki lum jingthang jong ki jaidbynriew ki bapher bapher” ong u Bah Sanbor bad ka bynrap, ba ka long kaba donkam bha ban shna ïa ka surok kaba heh da ka jingthmu ban pynsuk ïa ka leit ka wan jong ki paitbah khamtam ha ka por ba ki leit on tep ne leit on thang ïa ki baieid bathoin ki jongki.
U Bah Sanbor ula ai khublei ïa ka tnad PWD bad khamtam ïa u Executive Engineer (EE) u Bah S Lytep uba la khlad noh dang shen, uba la shim khia bha ban pyniaid shakhmat ïa kane kam.Ka tnad PWD ka lah dep ban pynkhreh ïa ka Estimate bad DPR bad la phah sha ka ophis jong u Chief Engineer bad ha ka taiew ban wan, u Engineer uba thymmai un sa wan ban shimti noh ïa ka kam.
“Ma nga bad Bah Paul ngin sa leit tynruh ïa ka Tnad Planning bad Finance bad ngin ialeh katba lah ban pynsted ban ioh noh ïa ka bhah tyngka khnang ban ioh shna ïa kane ka surok” ong u Bah Sanbor.
Ula ïathuh, ba ïa kane ka surok kaba jrong 400 mitar tam bad jingiar ka surok ka long 7 mitar shiteng, yn shna ha ka jinglut jingsep kaba kot T.12 Klur kaban kynthup ïa ka jingpynmadan ïa katei ka jaka, jingker kynroh, jingshna ïa ki nala, bad ban siang rong.