Shim ka Shillong College ïa ka shnong Mawkasiang ban kyntiew ka pule bad ki kam pynroi

Shillong, Nailar 29: Ka Shillong College ka la jied bad shim ïa ka shnong Mawkasiang hapoh ka Unnat Bharat Abhiyan ha ka National Library Day 2026, da kaba soi ïa ka jingïamynjur da ki nongïalam ka shnong na ka bynta ban kyntiew ïa ka pule puthi bad kiwei kiwei ki kam pynroi hapoh ka shnong.
Na ka liang ki bor pynïaid ka college central library ki la noh synniang sngewbha da ki kot sha ka Mawkasiang community library, ha kaba ïa kine la aiti sha u Rangbah Shnong u Bah Tishalding Kharkongor.
Na ka liang Librarian Dr Betbhalin Lyngdoh la banjur halor ki 5 tylli ki Ranganathan Law ka Library Science, katba Vice Principal EN Dkhar la ong ba ki library ki dei ki jaka kiba myntoi bha na ka bynta ban kyntiew ïa ki kam pule puthi kiba pynïasoh ïa ki paidbah da ki jingshemphang bad ki thaw ki lad na ka bynta ka jingnang jingtip bad ka jingtei ka kam shimet.
Na ka liang Principal Dr Shanwell Khongwir la ong ba ka jingshim ïa kane ka shnong ka dei ka jingïateh paralok kaba slem kaba kynthup ïa ka koit ka khiah, ka pule puthi, ka kam ïalehkai, ka sawdong sawkun bad ki prokram pynsngewthuh halor ki phang bapher bapher kiba ïadei bad ka imlang sahlang.
Halor kane, na ka liang u Rangbah Shnong u la pynpaw ka jingai khublei ïa ka college bad pynthikna ba kan don ka jingïatreilang na ka liang ka shnong halor kine ki kam kiba myntoi bad kyntiew ïa ka imlang sahlang.
Ha kane ka prokram la wan ban ïashim bynta da ki samla pule bad khynnah na ki skul bapher bapher kiba hab hapoh ka shnong Mawkasiang, ki dkhot ki nongïalam shnong, ki dkhot ka Village Sports Club, ki dkhot jong ki bor pynïaid shnong bad ka Campus Committee jong ka college, IQAC bad ka Library Advisory Committee.