Mang ka sorkar kumba 10 lak tyngka ban shna ïa ka ICDS bathymmai ha Umpling Dong Umbah

Shillong, Nailar 29: U Myntri Rangbah ka jylla u Conrad Sangma u la ïathuh ba ka jingtei ïa ka ïing Aganwadi hapoh ka shnong Umpling Dong Umbah Aganwadi Centre kaba la tip da ka kyrteng Umpling-6 la dep ban mang ha ka snem mang tyngka u snem 2025-26 da kaba iaidlang bad ka MGNREGS (C&RD Block).
Ïa kane u la u jubab ïa ka jingkylli ba la wanrah da u MLA ka Mawryngkneng u Bah Heavingstone Kharpran haba ïadei bad ka jingtei ïa ki Aganwadi ne ICDS Building ha Umpling Dong Umbah Centre.
Shuh shuh u Myntri Rangbah u la ïathuh ba ka Umpling Dong Shaneng Aganwadi Centre ka dei kaba don mynta da ka kyrteng Umpling-5. “Ka jingtei ïa ka Aganwadi kaba thymmai yn sa shim ha ka jingtei jong ka bynta ka ban wan bad lada ki bor shnong ki pynbeit bad ki ai sngewbha ïa ka jaka sha ka Child Development Project Officer kaba dei ka kam kaba dangsah haduh kine ki sngi,” pyntip u Myntri Rangbah.
Haba ïathuh ïa ka jingmang pisa u Myntri Rangbah u la ong, “Baroh kaba la mang ka long T. 10 lak kaba kynthup ïa ka T. 8 lak na ka MGNERGS ne ka VB-G RAM G bad T. 2 lak na ka tnat Social Welfare.”
Haba ïadei bad ka jingkylli la ka kam ban pyntrei ka la sdang ne em, u Myntri Rangbah u la ïathuh ba kumba ka long haduh mynta ka jingtrei ïa kane ka jaka kam pat sdang hynrei ka kam kan sdang na kane ka snem mang tyngka kaba mynta u snem 2026-27.
Shuh shuh u Myntri Rangbah u la ïathuh ba ka jingslem ban sdang ïa kane ka kam ka long ba ka Umpling VEC ka don ka jingdon bun ka projek MGNREGA na ka snem mang tyngka u snem 2025-26 kyrpang ka jingtei ïa ka surok MTR na ka jaka sah ka Kong Patricia Kharmawphlang sha ka surok PWD ha Lumdiengmet kaba la dep ha u bnai Jylliew 2026 bad la kumno kumno na ka liang ka VEC kan sa pynlong ka jingleit jurip na ka bynta ban sdang noh ïa kane ka kam kaba thymmai la kumno kumno ha u Nailur ne u bnai Risaw mynta u snem.