5 lak tyngka ai u Conrad ha RR Colony ban maramot ïa u Mot jong u Subhas Chandra Bose

Shillong, Nailar 29: Haba bteng ïa ka jingleit sha ki jaka ba shah ktah ha ki kam thombor ba dang shen ha Shillong, u Myntri Rangbah ka Jylla Meghalaya u Conrad K. Sangma ha ka sngi Saitjaiñ u la leit jngoh ïa ka R.R. Colony ha Rynjah bad ïakynduh ïa ki dkhot jong ka jaidbynriew bym dei riewlum ha katei ka jaka hadien ba mot jong u Netaji Subhas Chandra Bose ka la shah pynjulor ha ka por ba pynlong ïa ka jingïakhih jong ka Khasi Student Union.
Ïa kane ka jingleit jngoh la iohi kum ka jingpyrshang ban pynsngew skhem ïa ki nongshong shnong bad ban weng ïa ki jingeh hadien ka jingshah thombor bad jingpynjot ïa ki jingtei ha ka por ba pynlong ka KSU da ka rally thuk thuk bad rah lama ïong.
U Sangma u la jurip ïa katei ka jaka kaba la shah pynjulor jong u mot, u la ïakynduh bad ki nongshong shnong bad u la pynthikna ba yn sa pynbha biang ia ka.U la ai sngewbha ?5 lak na ka bynta ka kam ban maramot ïa u mot.
“La pynkynmaw biang sha ki nongshong shnong ba ka Sorkar ka pyrshah jur ïa ki kam pynjot bad ïa kino kino ki bor kiba buh jingma ïa ka jingsuk, ka jingïatylli bad jong ka nongbah bad ka Jylla jong ngi,” u Myntri Rangbah ka Jylla ha ka X.
Ïa u tei ka mot dur, la shah pynjulor ha ka por ba pynlong ïa ka rally jong ka KSU, kaba la sakhi ïa ka jingia thombor bad ka jingpynjot ïa ki jingtei ha ki katto katne ki jaka ha ka nongbah Shillong.Ïa kane ka jingiakhih la pynlong ban pynbor ban pynurlong ïa ki jingdawa jong ka KSU.
Ka sorkar jylla ka la pynskhem ba ïa baroh kiba donkti ha ka jingthombor bad pynjot yn leh katkum ka aiñ.