Ym dei ban shu shaniah beit tang ha ki bor pulit ka sorkar pdeng ban wan ïarap ïa ka jylla: Dr.Mukul

Shillong, Nailar 28: U Symbud Myntri Rangbah ba khmih ïa ka Kam Pohïing (Police) u Bah Prestone Tynsong ha ka sngi Thohdieng ula ong ba ka jingdon jong ki Special Force-10 (SF-10) la pynhiar na ka 1,794 sha ka 901 ngut ha u 2020-21 hadien ba la khmih bniah ïa ka jinglong jingman ka suk ka saiñ ka jingshong shngaiñ, haba ban jur ba ka jingthmu ba kongsan hi ka dang ïai neh kumjuh naduh ba la sdang ia ka ha u snem 2014.
Ïa kane u la ong haba jubab ïa ka cut motion ba la wanrah da u Nongïalam ka Liang Pyrshah u Dr. Mukul Sangma ha Ïingdorbar Thaw Aiñ kaba dei ka dorbar Synrai, u Bah Prestone ula ong ba ïa ka SF-10 la pynkha ha u snem 2014 da ka Sorkar u Mukul Sangma ban ïakhun ïa ki kam kaikhlaw bad pyndonkam haba don ka jingthut ka shongsuk shongsaiñ bad kiwei.
U la iathuh ba ka jingdon ki Commando haba sdang ka long 1794 ngut, kynthup ïa 118 ngut ki Kynthei ba la phiah sha ka Commando wing ba long 66% bad ka Law & Order ba 34%. Namar ka jingkylla ha ka jinglong jingman, la wanrah ïa ka jingpynkylla bad la pynbeit ryntih ïa ki, kaba pynduna ïa ka jingdon ki commando sha ka 901 ngut.
U la iathuh ruh ba ïa kane ka kynhun pahara la phah mynta ba kin don ha ki artylli ki kut ha Eastern bad Western Range ula ong bad bynrap ba ïa ka kyrdan jinghikai bad ka jingbha ym shym la pynthut eiei bad ïa ki jingtbit la ju pynkiew kyrdan man ka por.
U Bah Tynsong u ïathuh ba ju pynlong ruh ba ïa ki Physical Proficiency test ba man ka por bad katto katne ki Commando la pynkynriah noh sha ki DEF lane battalion haba pynshong nongrim ïa ka rta, hynrei ka mynsiem jong ka SF-10 hi ka dei ka bym lah ban pyntlot kumba ka la long naduh kaba sdang.
U Nongïalam ka Liang Pyrshah haba wanrah ia ka cut motion, ula ong ba ka Meghalaya khatduh ka la lah ban lait na ka jingshaniah ha ki bor pahara ka Sorkar pdeng kum ka COBRA, CRPF da kaba wanrah ïa la ka jong ka kynhun Commando SF-10, hynrei ïa ka jingthmu jong kane ka kynhun la pyntroiñ noh mynta.
U Dr. Mukul ula ong ba ka Jylla baroh shikatta ka ju shaniah ha ki bor pahara ka Sorkar Pdeng namar ka jingbym don ki bor pahara ba biang na la Jylla, tad haduh ka rai ban sei ïa la ki jong ki briew kynthei bad shynrang ban ïada ïa la ka jong ka Jylla.
U Dr Mukul u la ïathuh ba ïa ka SF-10 la pynkha da artylli ki shnat, ka Rangers bad Battalion, katba ka Battalion ka ïaid lyngba kawei na ki jingjied bad jinghikai kaba eh tam ka ban pyni ïa u pud ka jinglah jong ki shipai.
U la ïathuh ba ka jingmut ba kongsan ka long ba ki briew kiba la shah hikai na ka bynta ki kam ba kyrpang ki dei ban pynïakhlad bad shah pynlait na ki kam pulit ba man ka sngi, namar ka Tnad pulit ka dei ka bynta kaba kongsan ha ka jingpynïaid ïa ki kam ban pynïoh ïa ki jingbishar ba hok.
Ula ong ba ka jingpynkynriah ïa ki commando ba la dep hikai pyntbit sha ki DEF bad kiwei ki kam, ka dei kaba leh khlem da pyrkhat ïa ka jingthmu ha lyndet ba pynmih ïa kane ka kynhun, kumta u la ong ba ïa kane dei ban pynbeit noh da ka tnat ki Kam Pohïing jong ka sorkar jylla.
U Mukul ula maham ba ka Jylla ka lah ban mad ïa ki jingtynjuh kiba khraw bha lada mih ki jingjia kiba pynsniew ïa ka jinglong jingman haba kdew ïa ki jingjia ba dangshen ba la sakhi ha Tura.