Ki don kumba 3 tylli ki CHC ki bym don ki Sahep Doktor lane ki Medical Officer: Wailad

Shillong, Nailar 29: U Myntri ka tnat Health and Family Welfare ka sorkar jylla u Bah Wailadmiki Shylla u la iathuh hapoh ka Iingdorbar Synrai kaba dang shudep ba ki don haduh 3 tylli ki CHC bym ki Medical Officer bad na ki 48 tylli ki kam ba la mang ba bun na ki Specialist Doktor kim treh ban leit trei bad dei halor kane ka daw ba duna bha ki doktor ba la pyntbit kyrpang ha ka jylla.
Ïa kane u la jubab ïa ka jingkylli ba la wanrah da u Dr. M Rahman Kazi halor ka phang ka jingdon ki longkmie kiba kha khun ha ki jaka sumar.
Haba jubad ïa ka jingkylli bynrap u myntri u la ong ba ia mynta ki jaka sumar jong ka sorkar ki don 35 tylli ki CHC,121 tylli ki PHC bad 700 tylli ki Dispensary, ki Referral Unit ki don san tylli, lai tylli dang shna bad sa lai tylli dang bishar bniah ïa ki jaka.
Haba phai sha ka jingdon ki doktor la ïathuh ba lai tylli ki PHC kim don doktor bad ban pynkhlaiñ ïa ka jingai jingsumar dang shen ka sorkar ka la thung 400 ngut ki doktor, bad la thung kontrak 300 ngut ki nos haba phai ïa ka jingdon ki doktor specialist ha jylla Meghalaya ka dang duna shaba palat ka jingduna ka long ba ym don doktor.
U la ong ba ka sorkar ka la shim ïa ki lad ki lynti ba kumno ban pynsngewthuh ba donkam ban leit kha sha ki jaka sumar ban lait na kano kano ka jingjia ba sngewsih dei halor kane ba la pyntreikam ïa ka Mother’s Apps bad kane ka la long ka jingkyrkhu bad mynta ka jingleit kha khun sha ki jaka sumar ka la poi sha ka 81%, ka jingkhlad ki longkmie kala hiar sha ka 56% bad ki khyllung sha ka 40%.
Haba ïadei dei bad ki kali Ambulance ka sorkar ka dang ïaleh ban thied thymmai ban pynbiang ha ki CHC haba ïadei bad ka jingleit sumar ki longkmie kiba armet ha ka MHIS la mang T.30 hajar/-bad ka sorkar ka pynkit ei ban pynpoi sha ki jaka jingsumar ban leit kha namar ka jingjngai ki lynti syngkien ka sorkar ka la shna ïa ki jaka sah na ka 23 tylli kiba don mynshuwa mynta ka la poi sha ka 85 tylli.
Halor ka jingkylli ïa ka jingdon jong ki MCH u Myntri u la ïathuh ba ha ka jylla ki la don kumba lai tylli ki MCH bad kawei ka don ha South West Garo Hills, kawei ha Nongstoiñ bad kawei ha Umsning bad kine ki treikam bha ban sumar ïa ki nongshong shnong.