Balei phi sngewsih haba lait bad lehbha ki Khynnah Pule?
Buh jingkylli u Myntri ba kynthoh ïa ka CM IMPACT
Shillong, Nailar 29 : U Myntri ka tnat Pule Puthi, Lahkmen Rymbui u la buh jingkylli kylla ïa kito kiba kynthoh halor ka jingkiew ka jingdon ki khynnah pule kiba pass bha ha ka eksam Secondary School Leaving Certificate (SSLC) na ka 50 persen sha ka 96 persen da ka jingïarap lang jong ka CM IMPACT.
Haba jubab ïa ka jingïatai ha Iing Dorbar Thawain ka Jylla kaba dagn shu dep shen, u Myntri la ong ruh ba ka sorkar kam dei ban shah kynthoh namar ka jingïarap ïa ki khynnah pule ban pass.
“Balei phi sngewsih haba ki khynnah pule ki pass? Kaei ka jingduna kaba phi don pyrshah ïa ki? Phi kwah ba kin fail?” kylli u Myntri.
Shuh shuh u la pynshai ruh ba ki khynnah skul khamtam kito kiba sah ha sor ki pynlut ïa ka por bad ka bor wat ban leit khreh kot (tuition) hynrei ki khynnah pule kiba dei na ki longiing ba duk bad na nongkyndong ki donkam ïa ka jingïarap lem.
U Myntri u la ong ruh, “Ha man la ki dukan die kot, la die ïa ki kot ïarap kiba la pynmih da ki kompeni shimet. Hato ki khynnah pule ka Meghalaya kim don hok ban ïoh jingïarap? Lada ki phiel shi snem, kin iehnoh ïa ka jingpule. Hato ngi dei ban kmen lada ka jingpep skul shiteng por (dropout) ka kiew? Haba mynta ka jingdon kiba pep skul shiteng por ka la hiar sha ka 6.2 persen baroh ki sngewsih,” u la ong.
Shuh shuh u Myntri u la ong ba ka jingpynbha ïa ki result ka dei ruh na ka jingkyrshan borbah jong ka sorkar ban pynbha ïa ki skul secondary bad ban plie ïa ki skul higher secondary bad ki kolej.
“Ka sorkar kan pynurlong ïa laka jingkular ban ai ka jingshakri kaba bha tam bad ka jinglah ban ïoh ïa ka jingpule kaba paka. Ngi la dep ruh ban mang 19 tylli ki People’s Colleges na ka pla pisa jong ka jylla,” u la ong.
Haba kyntu ïa ki dkhot ka Iing Dorbar ban ai ki jingai jingmut kiba tei ha ka jaka ban kynthoh, u la ong, “Ai jingai jingmut ïa nga kumno ban pynbha ïa ka CM IMPACT, ngin leh ïa kata na ka bynta ka jingmyntoi jong ki khynnah pule jong ngi.”
Shuh shuh u Myntri u la ong ruh ba ki sngewnguh ïa u Myntri Rangbah u ba mang haduh 19 tylli ki People’s Colleges na ka pla pisa jong ka sorkar na ka bynta ki samla ka jylla ban ïoh ïa ka jingpule kaba paka tam ha ka thain jong ki.”