Ym pat siew bai jaka ïa ka surok 6 Lane na Jorabat sha Umïam bad na Umïam sha Silchar

Shillong Nailar 29: Ym pat siew ïa ka bai lutksan ne Compensation haduh mynta ïa ki nongshong shnong kiba la shah ktah ne kiba hap ban ai ïa ki jaka puta jongki na ka jingthmu ban shna ïa ka surok Six Lane na Jorabat shaduh Umiam bad ïa ka High-Speed Corridor na Umiam sha Silchar, la pyntip ka Sorkar Jylla hapoh ka ïing Dorbar Thaw Aiñ ka jylla hynne ka Sngi Thohdieng.
Haba jubab lyngba ka jingthoh, ïa ka jingkylli jong u MLA ka Nongkrem u Bah Ardent M Basaiawmoit, u Symbud Myntri Rangbah ka Jylla uba khmih ia ka Public Works Department (PWD) (Roads) u Bah Prestone Tynsong ula ong, ba ka jingshim ïa ki jaka na ka bynta ka National Highways bad High-Speed Corridor Project ha Meghalaya ka dei ka kam kaba dang ïaid shakhmat hapoh jong ki kyndon jong ka National Highways Act, 1956.
“Ki rukom treikam ki long ban pynthikna ba ki nongshong shnong kin ïoh pdiang ïa ka Compensation bad Rehabilitation kaba biang katkum ka NH Act, 1956” ong u Bah Prestone.
Halor ka jingsiew baroh ïa ka Compensation na ka bynta kitei ki artylli ki projek, u Symbud Myntri Rangbah ula ong, “Ym pat shym la siew ïa ka bai jaka sha ki trai shnong na ka bynta ka surok Six-Lane na Jorabat sha Umiam bad wat ïa ka Compensation sha ki trai shnong ka Meghalaya na ka bynta ka High-Speed Corridor na Umiam shaduh Silchar ruh ym pat shym la siew”.
Ula ïathuh, ba ïa kane ka surok kaba jrong 400 metre tam bad jingïar ka surok ka long 7 metre shiteng.