Haduh 5413 ngut ki VVIP bad VIP ki la wan sha ka jylla bad hap lut ka jylla: Prestone
Poi kyrdan ba 4 ki pulit jylla ban ïoh khusnam na ka President
Shillong, Nailar 28: U Symbud Myntri Rangbah ka jylla bad u Myntri ba khmih ïa ka tnat ki Kam Pohïing u Bah Prestone Tynsong u la ong ba ka Jylla ka la sakhi ïa ka jingwan haduh 5413 ngut ki VVIP bad VIP naduh ba kut jong u snem mang tyngka 2025-26 tad haduh une u bnai Nailar.
U Bah Tynsong u la ïathuh ïa kane hapoh ka Dorbar Synrai ha ka sngi Thohdieng haba jubab ïa ka Cut Motion ba la wanrah da u Nongïalam ka Liang Pyrshah bad u MLA ka TMC u Dr. Mukul Sangma.
Shuh shuh u Bah Prestone ula ong kiba bun ki VVIP ba wan sha Jylla ki dei kiba wan na Delhi.
U la ong, “Ngi ïohi ïa ka jingwan ka President, Vice President, ki Myntri ka Sorkar Pdeng, ka jingwan u Myntri Rangbah Duh ka Ri, ki Lat ka Jylla, ki Myntri Rangbah ki Jylla, ki Myntri jong ki Sorkar Jylla, ki Judge jong ka High Court bad ki heh Ophisar. Kane kam dei kaba rit, kumba 5413 ngut kila wan sha Jylla. Kumta ngi sngewthuh ba ka jingpynlut ka dei hi ban bei na ka Sorkar Jylla.”
Halor ki kyndon ban ithuh ïa ki VVIP bad VIP, u Bah Tynsong ula ong ba ka Sorkar ka buddien pyrkhing bha da ka Blue Book bad Yellow Book. Halor ki jingkynnoh VVIP/VIP culture, u Bah Prestone ula ong ba ka Sorkar ka la pynmih ïa ka SOP mynta la arbnai eiei halor ka jingpyndonkam ïa ki siren bad ki kali jong ki VIP.
“Ka la don ha ka jingthoh, Nga thikna ba ïa ki SOP la bud pyrkhing bha da baroh ki VIP,” ula ong.
Ha kaba ïadei pat ka jingïoh khusnam ka jylla jong ka tnat Pulit na ka President jong ka ri India kaba dei ka phang ba la wanrah da u MLA ka VPP na Mawlai u Bah Brighterwell Marbaniang u Bah Tynsong u la ong ba ka Prestigious President of India Police Colour Award ka long ka jingsarong ïa ka jylla naba ka President ka Ri ka jied bad ithuh ïa ki pulit ka jylla kum kiwei na ki kynhun kiba bha tam hapoh ka ri halor ki jingpahara bad ai jingïada.
“Ha ki jylla kane ka thaiñ shatei lammihngi ki pulit ka jylla ki don ha ka kyrdan kaba 4 ban ïoh ïa ka jingithuh napdeng kiwei ki jylla ha ka ri ban ïoh ka khusnam kaba heh tam bad kane ka jingai ïa kum kine ki khusnam ka la sang naduh u snem 1952 bad tang 19 tylli ki jylla kiba la ïoh ïa kane ka khusnam bad ïa kane ka khusnam la ju pynlong ha u bnai Nailur lane shwa ka 15 tarik jong u bnai Risaw,” ïathuh u Bah Prestone hapoh ka Ïing Dorbar.