2.37 klur tyngka donkam ban siew tulop ïa ki 13 ngut ki Food Safety Officer bad nongtrei Lab: Wailad

Shillong, Nailar 28 : Ka supplementary demand ba 2.37 klur tyngka ka dei ban siew tulop ïa ki 13 ngut ki Food Safety Officer ba dang shu thung thymmai bad ki 21 ngut ki nongtrei technical Laboratory ba thung contract jong ka State Food Testing Laboratory, ïathuh u Myntri ka Koit ka Khiah Bah Wailadmiki Shylla ha ïingdorbar Thaw Aiñ ha ka sngi Thohdieng.
Haba jubab ïa ka cut motion bala wanrah da ki MLA, Miani D Shira, Ardent Basaiawmoit, Brightstarwell Marbiang bad Mizanur Kazi, u Bah Wailad ula ong ba 1.98 klur tyngka ka dei ia ka tulop ki FSO bad 39.15 lak tyngka ka dei ïa ki nongtei ka Laboratory.
U ïathuh ba ia ki 13 ngut ki FSO la thung ha ka 9 tarik Nohprah 2025 lyngba ka MPSC hadien ba la aiti ïa ka mang tyngka u snem 2026-27. La buh ïa ki mynta ha baroh ki district, kynthup 4 ngut ha East Khasi Hills bad 3 ngut ha West Garo Hills.
Ki 21 ngut ki nongtrei Lab- ki trei ha ka Food Testing Lab kaba don marwei ha Pasteur Hill naduh u snem 1981- kaba la bei tyngka mynshuwa da ka FSSAI bad hadien la shimti noh da ka Sorkar Jylla ha ka 13 tarik Kyllalyngkot, 2023 ban pynthikna ba ki jingleh test kin ïai bteng.
U Bah Wailad u ïathuh ba kane ka lab ka la test haduh 16,682 tylli ki sample hapdeng u Iaiong 2021 haduh u Iaong 2026 bad ka jingpyntreikam ïa ka Food Safety ka shong eh ha ki nongtrei ba leit shabar ka Ophis bad ka jingbishar ka lab.
Halor ka jingtest ïa ki dohkha, ula ïathuh ba 30 na ki 788 ki sample la test positive ba ki khleh formalin ha u snem 2023-24, kaba lam sha ka jingkhang wanrah ïa ka dohkha haduh 15 sngi. Ula kyntu ïa ka ïing dorbar ban num pynduna ïa kane ka mang tyngka.