Shillong, Nailar 28 : Ka Meghalaya ka la bynrap shuh shuh sa palat 1000 jingthiah bad bei pisa jan 750 klur tyngka ha ki jingtei ban kyntiew ia ki jaka sumar jongka ka koit ka khiah ha ki san snem ba la leit noh, pyntip u Myntri ka Koit ka Khiah Bah Wailadmiki Shylla ha ka ïing Dorbar Thaw Aiñ mynta ka sngi Thohdieng.
Haba jubab ïa ki jingkylli halor ka koit ka khiah ha ka kynta kylli jingkylli, u Bah Wailad ula ïathuh ba ki jingpynlut ka dei ba la nang bun ki nongwan sumar sha ki jaka sumar kaba kiew na ka 17 lak ha u 2017-18 sha ka 25 lak ha u 2025-26- ka jingkiew ba kot haduh 46.8%.
U pynpaw ba ka jingkiew ha ka jingdon ki nongïoh bynta jong ka MHIS da 60% ka la pyni ïa ka jingnang kiew ka jingshaniah u paidbah.
Halor ki prokram ka koit ka khiah ki Kmie bad ki Khunlung, u Bah Wailad u ïathuh ba ka Jylla kala pynlut 120 klur tyngka ha ki saw snem, palat ban ïa ka jingpynlut ka Sorkar Pdeng ba 110 klur tyngka. Da ka MHIS, ka jingpynlut baroh lang kala kiew sha ka 170 klur tyngka.
U Myntri u pyntip ba hapoh ka CM Safe Motherhood Scheme, ki Longkmie bad ki Khynnah ki la ïoh mynta ïa ka leit ka wan ba khlem jingsiew-palat 1 lak sien ha ka shisnem-na ka kyndon ba mynshuwa kaba kynthup tang ïa ka jingleit buh haba leit kha Khunlung.
Ban ïaleh pyrshah ïa ka jingkyntait ki Kmie ba kin wan sha ki jaka sumar namar ka jingsngewkhia ïa ka sumar sukher ïa ki Khun, ka Sorkar kala buh ïa ki transit home ha kaba ki lah ban wanrah ïa la ki jong ki Khun.
Ki ASHA bad ki nongap ki ïoh ruh ïa ka bainong kaba long 1000 ha man ka jingkha khunlung.
“Ka jingiap ki Kmie ba kha khun kala hiar da 56% hangne-ka sien ba nyngkong ha ka histori ka Jylla-ka jingiap ki Khunlung ka hiar da 40% na ka jingkheiñ u snem 2021” kam u bah Wailad.
U ïathuh ba ka Mother APP mynta ka bud dien ïa man ki kynthei ba armet haduh ki shnong ki thaw bad la pynkylla ïa ka MHIS ba kan treikam .
Hapoh u Lber 2027, u ong, ka Jylla kan don 121 tylli ki PHC, 35 tylli ki CHC bad 700 tylli ki Sub Centre, kaba bun tam ïa ki kyndon ka Ri, bad mynta ka don bun eh ïa ki First Referal Unit.
