Shillong, Nailar 28 : Ka Sorkar Jylla ka la nang wad ban pynthikna la ki don ne em ki nongshong shnong ka Jylla kiba sahkut ha Nepal namar ka jingshlei um, ong u Symbud Myntri Rangbah khmih ïa ki kam Pohïing, Bah Prestone Tynsong ha ka sngi Thohdieng.
Ym pat don satia kano kano ka case ba la pyntip sha ngi kat haduh mynta, ula ong haba pynpaw ïa ka jingsngewlem ïa ki lanot kiba iap ha ka jingshlei um ha Nepal.
“Ka long kaba sngewsih jur. Nga phah ïa ka jingsngewlem sha baroh ka Nepal” ula ong.
Haba kylli la ki don ki nong Meghalaya kiba ngat ha kane ka jingjia, u Bah Prestone ula ong “Ngim pat ïoh satia ïa kano kano ka jingtip. Nga la dep bthah ïa u Chief Secretary bad ka DGP ban wad la ki don ne em ki nongshong shnong ka Meghalaya kiba ngat. Haduh mynta, ngim pat ïoh jingtip”.
Haba pynpaw ba ka Jylla ka long kaba la pynkhreh ban tehlakam ïa kano kano ka jingjia ba kyrkieh, ula ong ba ka Meghalaya ka la pynkhreh pura ïa kino kino ki jingjia, lada dei kiba jia hapoh ka Jylla lane sha kano kano ka jaka hapoh ka Ri.
Halor ka jinglang bad shlei um ha Jorabat ha ka por slap, u Bah Prestone ula ong ba kane ka bynta ba shlei um ka hap hapoh ka jingkhmih ka NHAI bad kam dei satia jong ka Tnad PWD ka Jylla.
U ong ba dei ka jingbahkhlieh ka NHAI ban sumar bad shna ïa ka surok bad ka la dei ban pynlong ïa ka sorjamin kaba bniah ïa ka kyrdan jong ka surok hashuwa ban pyntrei ïa ka kam.
“Nga la shong jingialang bad ki heh ka NHAI bad bthah ia ki ba kin pynlong biang ïa ka sorjamin kaba bniah bad ban leh ïa kaba donkam, namar wat haba slap rit ruh, ka surok ka lang bad shlei um” ula ong.
