Wanrah ïa ka Resolution halor ka FCRA ha ka Dorbar ban wan ai jingmut u Dr.Mukul ïa ka Sorkar

Shillong, Nailar 28 : U Nongïalam ka Liang Pyrshah u Dr Mukul Sangma ha ka sngi Thohdieng ula ong ba ka Sorkar Jylla kala dei ban wanrah ïa la ka jong ka Resolution halor ka kam jingpynkylla ia ka Foreign Contribution Regulation Act (FCRA) ban lah pynpaw ïa ka jingsngew ki paidbah ka Meghalaya bad ka thaiñ Shatei Lam Mihngi hakhmat ka sorkar pdeng.
U Dr Mukul ula ong ba ka FCRA ka dang ïai long ka jingeh kaba khraw bha kaba ïa takhuh ka Meghalaya, Nagaland, Mizoram bad kiwei ki Jylla ka thaiñ Shatei Lam Mihngi.
Haba pynpaw ba ka Liang Pyrshah ka la wanrah ïa ka resolution halor kane ka mat, u ong ba kan ïahap bha lada ka Liang Synshar kan wanrah ïa ka Resolution na Sorkar hadien ka jingïakren.
“Ka Liang Pyrshah kala wanrah ïa ka resolution, hynrei kan kham bha shibun ïa ka Sorkar ba kan wanrah da ka resolution ka Sorkar. Ki la dei ban pynjlan ïa ka por bad ngin jin da la ïoh ia ka lad ban mynjur ïa ka resolution” ula ong.
U ong ba ka Sorkar kala dei ban shah ban ïakren halor ka resolution bala wanrah da ka Liang Pyrshah bad hadien sa wanrah pat da la ka jong.
U Mukul ula ong ba un sa kyrpad ïa ka Sorkar ba kan wanrah ïa ka resolution halor ka FRCA ha ka sien shong dorbar ban wan khnang yn lah shim khia bha ïa ki jingsngewkhia ki padbah.