Kumba palat 65% kiew ka jingpynkha khun ha ki jaka sumar katkum ka NHFS-6 : Bah Wailad

Shillong, Nailar 28: Ka Meghalaya ka la kyntiew shuh sa palat 1000 jingthiah bad kynshew jan T.750 klur ha ki jingtei ka koit ka khiah ha ki san snem ba la leit noh, ïathuh u Myntri ka Koit ka Khiah Bah Wailadmiki Shylla ha ka Iingdorbar Thaw Ain ha ka sngi Thohdieng bad pyntip ruh ba ka percentage ka jingpynkha khun ha ki jaka sumar katkum ka National Family Health Survey-6 ka la long 65%.
U la ong ba ka jingkylla ha ka percentage ha jylla hapdeng ka NFHS-6 bad NHFS-5 ka long 12.9% ka jingkylla na ka 58.1% (NHFS-5) sha ka 65.6% (NHFS-6).
Haba jubab ïa ki jingkylli halor ka koit ka khiah ha ka kynta kylli jingkylli, u Bah Wailad ula ïathuh ba ki jingkynshew kila lam sha ka jingbun ki nongwan sumar sha ki jaka sumar kaba kiew na ka 17 lak ha u 2017-18 sha ka 25 lak ha u 2025-26- ka jingkiew ba kot haduh 46.8%.
U pynpaw ba ka jingkiew ha ka jingdon ki nongïoh bynta jong ka MHIS da 60% ka la pyni ïa ka jingnang kiew ka jingshaniah u paidbah.
Halor ki prokram ka koit ka khiah ki Kmie bad ki Khunlung, u Bah Wailad u ïathuh ba ka Jylla ka la pynlut T.120 klur ha ki saw snem, palat ban ïa ka jingpynlut ka Sorkar Pdeng ba T.110 klur. Da ka MHIS, ka jingpynlut baroh lang ka la kiew sha ka T.170 klur.
U Myntri u pyntip ba hapoh ka CM Safe Motherhood Scheme (CMSMS), ki Longkmie bad ki Khynnah kila ïoh mynta ïa ka leit ka wan ba khlem jingsiew-palat 1 lak trip ha ka shisnem-na ka kyndon ba mynshuwa kaba kynthup tang ïa ka jingleit buh haba leit kha Khunlung.
Ban ïaleh pyrshah ïa ka jingkyntait ki Kmie ba kin wan sha ki jaka sumar namar ka jingsngewkhia ïa ka sumar sukher ïa ki Khun, ka Sorkar ka la buh ïa ki transit home ha kaba ki lah ban wanrah ïa la ki jong ki Khun.
Ki ASHA bad ki nongap ki ïoh ruh ïa ka bainong kaba long T.1000 ha man ka jingkha khunlung.
“Ka jingïap ki Kmie ba kha khun ka la hiar da 56% hangne-ka sien ba nyngkong ha ka histori ka Jylla-ka jingïap ki Khunlung ka hiar da 40% na ka jingkheiñ u snem 2021,” ïathuh u Bah Wailad.
U Bah Wailad u la pyntip ba ka Mother APP mynta ka buddien ïa man ki kynthei ba armet haduh ki shnong ki thaw bad la pynkylla ïa ka MHIS ba kan treikam khlem ka jingdon pisa.
Hapoh u Lber 2027, u ong, ka Jylla kan don 121 tylli ki PHC, 35 tylli ki CHC bad 700 tylli ki Sub Centre, kaba tam ïa ki kyndon ka Ri, bad mynta ka don bun eh ïa ki First Referal Unit.
Ha kawei pat ka liang u Myntri ka Koit ka Khiah u la ong ba ha kine ki 3 snem ka jylla ka la thmu ban kyntiew ïa ki jingpynkha khun ha ki jaka sumar sha ka 95% ka ban kiew ia ka National Average kaba long 90%.