Sah satang ka jingshim jaka ban ïoh shna noh ïa ka Scientific Landfill Site ha Nonghali: Bah Sniawbhalang

Shillong, Nailar 28: U Symbud Myntri Rangbah ba khmih ia ka tnat Pynroi Sor ka jylla u Bah Sniawbhalang Dhar u la ïathuh ba ka jaka Theh ñuit hapoh Nonghali ne ka Scientific Landfill Site ka la jan poi artat sha ka lynti jong ka jingshim jaka bad kane ka kam ka dang ïaid bad tang shu dep baroh ki jingdonkam baroh yn pynsted noh ïa kane ka kam.
Ïa kane u la jubab ïa ka jingkylli ba la wanrah da u MLA ka VPP na Mawlai Constituency u Bah Brightarwell Marbaniang halor ka jingeh kaba ki nongshong shnong ka Mawlai kiba la shah ktah na ka jingdon ka Marten kaba la sma iwtung, kaba la ktah ïa ka koit ka khiah, ka jingdon dor ka jaka, ka ïoh ka kot ka kamai kajih ki nong Mawlai bad khamtam ba kam don satia ka jingwan shim jingkheiñ ïa ka jingma katei ka jaka theh ñiut bad kumjuh ka koit ka khiah ki nongshong shnong, kumta u la kyrpad ïa ka tnat ban pynsted noh ban pyntreikam ïa ka Nonghali Scientific Landfill site.
Halor kane, katkum ka jingïathuh u Bah Sniawbhalang u la ong ba katkum ki kyndon jong ka Solid Waste Management Rules, 2026 ka jingshna ïa ka integrated solid waste processing bad ki jaka bret ñuit ki don kam ïa ka jingïoh jingbit ne ka Environmental Clearance (EC) na ka State Level Environment Impact Assesment Authority (SEIAA).
U la ïathuh ba ki rukom treikam ban ïoh ïa ka Environmental Clearance ki don kam ban bud da kaba pynlong ïa ki jingbishar paidbah da ka Meghalaya State Pullotion Board kaba la dep pynlong ha ka 23 tarik u Nailur mynta u snem.
“Hadien kane ka jingbishar paidbah ka la don ka jingpyrshah ha kaba ki la ujor sha ka Ïingkashari bad ha ka 14 tarik u Naitung, 2026 la pynkut noh ïa kane ka mukotduma kaba la pynksan ïa ka sorkar jylla,” ïathuh u Bah Sniawbhalang.
U la ïathuh ba ka EIA ne EMP kaba khatduh dang pynkhreh mynta ban ïoh ïa ka EC da ka State Environmental Impact Assesment, Meghalaya.
Halor ka jingdon ki Landfill kiba la ithuh ha ka jylla, u Myntri ka Tnat Pynroi Sor na ka bynta ki Urban Town ki long ka Tura ha Wakkagre, ka Jowai ha Khliehriat Umlamat, Elaka Jowai, ha Williamnagar ka Rongakgre bad kiwei pat ki sor ba dang sah, la ïoh ki jingtyrwa ïa ki jaka bad mynta dang khmih bniah da ki District Task Force Committee.
Ha shwa kane u MLA ka Mawlai u la buh ruh ka jingai jingmut bad ruh ban tip haduh lano ka sorkar kan wad ka jaka kaba biang na ka bynta ban pynkynriah noh ïa ka Marten kaba don ha Mawlai Mawiong da kaba ai jingmut ruh ba lada ka sorkar ka don ka jaka kaba heh kumba 800 haduh 807 acre ha Mawkhanu, ka New Township ka la dei ban shna ïa ka Marten kaba heh bad kaba long katkum ka juk kaba mynta.
Haba phai biang sha ka Nonghali, u Symbud Myntri Rangbah u la ong ba kane ka jaka la pyndep lut ïa baroh ki jingdonkam ki rukom treikam, hynrei ka slem na ka daw ki jingpynlong ïa ki jingpynsngewthuh paidbah, ki jingbishar paidbah ba la sdang naduh ka 2 tarik u ïaïong 2025, nangta ha ka 23 tarik u Nailur 2026.