Bei tyngka ka IFAD haduh 45 lak tyngka na ka bynta ka ïewthymmai ha thaiñ Marngor

Nongstoiñ, Nailar 28: Ka International Fund for Agricultural Development lyngba ka Meghalamp (Meghalaya Livelihoods and Access to Market), kaba la pyntreikam pat da ka Meghalaya Basin Management Agency (MBMA), ka la bei tyngka haduh 45 lak na ka bynta ka ïew thymmai ha West Khasi Hills, kaba la tip ruh kum ka Marngor Farmers Markets.
Nalor ka 45 lak tyngka, na ka liang ka shnong Marngor ruh ka la pynlut lang 4 lak shiteng, kum shibynta ka jingsnohkti bad na ka bynta ki jingpynbit pynbiang ïa kane ka ïew thymmai hapoh jong ka thaiñ.
La ong ba ïa katei ka jaka kaba la pynlong ïew, la ai sngewbha da ka kur Sohshang ryngkat ka shnong Marngor kaba don ha khappud bad ka shnong Mawblei Mawjnoiñ, kaba la ju khot kum ka ïew Jatra, kaba dang hap ruh hapoh u pud u sam ka Hima Nobosohphoh Syiemship.
Ka jingthmu ban wanrah ïa katei ka ïew ka long halor ka nongrim ban pynmyntoi ïa ki nongrep ka thaiñ. Namar shibun ki mar rep ki mih na katei ka thaiñ khamtam eh u Biskot u ba lah long uwei na ki jingthung u ba la paw bha ha ka thaiñ bad ha ka jylla hi baroh kawei. Ym tang katta hynrei ïa une u jingthung la ïoh ban shallan ruh shibun wat sha kiwei pat ki jylla.
Shuh shuh, katei ka ïew ka don ruh kawei ka pung dohkha kaba itynnad bha ha kaba ki briew kiba la sngewthait ban shang ïew ruh, ki lah ban shu leit shong khwai kha bam na katei ka pung tang ha ka jingsiew kaba rit dor shi ryngwiang.
Ban pynbna ïar ïa kane ka ïew thymmai, ha ka sngi thohdieng kaba dei 28 tarik Nailar 2026 la ïoh ban plie paidbah ïa ka, ha kaba ka Hema Nayak IAS, Deputy Commissioner ka West Khasi Hills District, ka la plie paidbah ïa ka ïew thymmai hapoh ka shnong Marngor, kawei na ki shnong ha ka thaiñ Nongstoiñ C&RD Block West Khasi Hills District.
Kum ka dak jong ka jingplie paidbah ïa katei ka ïew, ka kongsan ka la ïoh ban plie ruh ïa u Mawsahnam jong katei ka ïew ryngkat ka jingïadonlang ruh u bah A.S.Suting Deputy Project Director MBMA, bah Gideon Kharmawphlang, Executive Director Technical MBMA, bah A.R.Nongkhlaw District Project Manager West Khasi Hills District.
Nangta kiwei pat ki kynthup ïa u bah Distoran Ïawphniaw Secretary ka Hima Nobosohphoh Syiemship, bah WB Sohshang Sordar shnong Marngor, u bah Dwinglang Sohshang myntri ka kur Sohshang jong ki trai khyndew jong katei ka ïew. La pynïaid ïa katei ka jingïalang da u bah Darius John Sohshang kum u shongknor jong katei ka jingïalang ha ryngkat ka jingsakhi jong ki paidbah na kylleng.
Ka Kongsan haba ai jingkren shwa ban plie ïa u mawsahnam, ka la ïaroh bad ai ruh ki kyntien khublei kitbok kit rwiang sha baroh kiba la donkti, la ka long naduh ki bor shnong, ki bor pynïaid District bad kito baroh kiba la lah ban pynurlong ïa kane ka ïew thymmai.
Ka la ong ba kam long satia kaba suk ban pynlong thaw lane wanrah ïa kine ki projek kiba heh. Hynrei baroh ki dei ki jingtrei shitom, ka jingïatreilang ha baroh ki liang kaba wanrah bad pynurlong. Ka kyrmen skhem ba kane ka ïew thymmai kan long ka jingkyrkhu bad ka jingmyntoi kaba shikatdei eh na ka bynta ki paidbah jong ka dong ka thain, khamtam eh ïa ki nongrep kiba ïoh mynta ïa ka lad ban pynïaid ïew ïa ki mar rep jong ki.