Nongpoh, Nailar 28: U wei u heprit ba dang 5 snem ka rta u la shah rong noh ha ka umsaw ha ka shnong Nonkchigittim, ha ka thaiñ Killing, Ri-Bhoi District. Une u heprit uba la tip kyrteng kum u Mewanshwa Mawblei.
Katkum ka jingtip bala ioh lum la ong ba kane ka jingjia kala jia hynne ka step bad namar ka jingjur slap, ka umsaw kala kiew kynsan kynsan bad ka la rong noh ïa utei u heprit sha ki bynta ba sharum ka wah.
Mar ïa tip ïa kane ka jingjia, ki paidbah nong shong shnong ryngkat bad ki pulit ki la jingïatreilang ban pynlong ïa ka jingwad paidbah. Hadien ka jingwad paidbah, la lap ïa u heprit ha ka por kumba 11 baje mynstep bad mar mar la pynkit noh sha PA Sangma International Medical College ban ïoh ïa ka jingsumar kaba kyrkieh, hynrei ki doktor ki la pynbna ba u la khlad noh shuwa ba un poi sha ka hospital.
Ha kaba jingïadei bad kane ka jingïap, namar ba ym shym la don kano kano ka jingïatharai sniew, ki bahaïing jong utei u heprit ki la kyrpad ban ym pynlong ïa ka post-mortem bad hadien ba la pyndep ïa ki jingdonkam baroh katkum ki kyndon jong ka aiñ, ki pulit ki la aiti noh ïa ka met jong utei u heprit sha ki bahaïing ban pyndep ïa ka jinglehniam kaba khatduh.
