Dei na ka jingpang kpoh bad khyllai ba khlad u khynnah 12 snem ha Tura ym ba dih ka umsoh Sting: Wailadmiki

Shillong, Nailar 27: Ka Sorkar jylla ha ka sngi Palei ka la pynshai hapoh ka dorbar Synrai ba ka jingkhlad noh u khynnah skul ba la 12 snem ha Tura kam don ka jingpynïasoh bad ka jingdih ïa ka umsoh ne ka Sting energy drink, ha kaba ka Civil Hospital ka la shem ba ka jingkhlad kadei na ka jingpang kpoh (gastroenteritis) bad ka jingpang khyllai ne acute kidney injury.
Ïa kane la jubab da u Myntri ka Tnat ka Koit ka Khiah ka jylla u Bah Wailadmiki Shylla ïa ka jingkylli ba bynrap ba la wanrah da u MLA ka TMC u Rupa Marak, uba la pan ïa ka daw kaba shisha halor ka jingkhlad u khynnah hadien ba la kynnoh ba u khynnah uba na Garo Hills u la khlad ba dih ïa ka Sting.
U Marak u la ong ba ka jubab da ka jingthoh ka kdew tang ïa ki hukum ba khang bad ym ïa ka daw jong ka jingkhlad.
Haba jubab, u Bah Shylla u la ong ba u khynnah ula khlad ha Civil Hospital, Tura. Katkum ka kaiphod u doctor, ka daw kadei na ka jingkyndit (irreversible shock), ka gastroenteritis kaba khamjur (AGE) kaba lam sha ka jingpang kidney bad uba la khlad u dang dap ha ka rta kaba 12 snem.
U Myntri u la ong ba lyngba ka jingmih ha ka kot khubor kaba don ka jingkynnoh ba ka jingkhlad ka don ka jingïadei bad ka jingdih ïa ka Sting, kumta ka Commissionerate of Food Safety, Meghalaya ha ka 14 tarik une u bnai ka la pynmih ïa ka hukum ba shipor hapoh ka Food Safety and Standards Act, 2006, kaba pynsangeh shipor ïa ka jingdie bad sam ïa ka Sting ha kylleng ka jylla bad la bthah ïa 2 ngut ki ophisar ban pynlong ka jingtohkit lyngba ka Food Safety Officer, West Garo Hills.
“Ïa ka kaiphod tohkit la ïohpdiang ha ka 15 tarik. Kam don ka daw ka jingïadei hapdeng ka jingïap bad ka jingdih ïa ka Sting bad khlem ka jingdon ka sakhi. Namar kata la shah biang ban die. Kadei ka jingmih kaba shisha na ka jingtohkit bad ym dei ba kyrshan ïa kane ka tiar,” ong u Bah Shylla.
U la bynrap ba ki ophisar ki la dep ban kynduh ïa ka kmie kaba ong ba u khun jong ka udei u bym da sngewtynnad bha ïa ka energy drink, bad ka khana lyngba ka jingsumar kam kdew ïa ka jingdih ïa ka song ne ka jingbam ba la shna.
Katba u Nongïalam ka Liang pyrshah u Dr. Mukul Sangma u la pynpaw halor ka jingdonkam ban pyntreikam ïa ki lad ïada ha ka bam ka dih bad ka jingkhmih bniah kaba la don hapoh ka Food Safety and Standards Act.
“Ngim lah ban shim ba ka kaiphod u doktor marwei kan dei kaba khatduh. Hato ka sorkar ka la bishar biang halor ki lad jingïada hadien kane ka jingjia bym poi pyrkhat? Ka ïew ka la tuid da ki jingbam ba la song bad kiba la shna, bun kiba la kut ka por. Manla ki kmie ki khun ki leit sha ki ïew bad ki khun ruh ki shah khring ha ki dukan bad da ka jingbym don ki jingbthah, ka don ka jingthylli kaba la shem ba ka long kaba donkam,” ong u Sangma
Haba shim ïa kine ki jingai jingmut, u Bah Shylla u la ong ba ka la don ka jingïalang bishar kam kaba la shim hadien kane ka jingjia ha Tura bad la shim ruh ki muna kiba la dep ban jurip bad khmih ha ka 14 tarik na North Garo Hills, West Khasi Hills, East Jaiñtia Hills, West Jaiñtia Hills bad Ri-Bhoi, bad dang ap ïa ki jingmih. ïa ki nongmuna la phah sha ki laboratory bapher bapher ban khmih lang.
Haba ïathuh halor ki jingkhmih bniah ba ju leh da ka tnat, u Myntri u la ïathuh ba la pyndep haduh 3,756 tylli ki jingjurip ha kine ki 3 snem ba la dep, la leh test 2,844 tylli ki regulatory sample bad kynthup ïa ki 5,741 surveillance sample, kynthup ïa ka doh, ka dud, ka um bad kiwei ki mar bam bad da ka jingbuh por kaba donkam la kumno kumno 10 tylli ki jingjurip ba dei ban leh ne pyndep.