Mynsawjur u rangbah ba shah thombor ha ki suba nong Bangladesh ha Wahkoh, Umkiang EJHD

Khliehriat nailar 27 :- Ki pulit jong ka Umkiang Patrolling Post hadien ba ki la ioh pdiang ïa ka jingujor na u Bah Basih Khonglah ba u nongtrei jong u, u Kornal Ahmed u la shah rahbor ha ki suba nong Bangladesh ha song Wahkoh ha Umkiang East Jaiñtia Hills District bad ki pulit ki la hiar mar mar sha katei ka jaka bad lap ïa u Kornal uba la thiah lyngktar harud surok hapdeng ka jingmynsaw jur na ka bynta ka kti ka mon jong u.
Hadien kane la pynkit noh ïa u shapoh Umkiang PHC na ka bynta ban aijingsumar.
Ha ka jingtohkit la ioh jingtip ba u Kornal Ahmed u la leit sha dong Wahkoh ha ryngkat u Gopal Marak lem bad u Jakir Hussain ban leit shim ïa ka pisa T.2 lak tyngka lyngba ka jingbthah jong uwei u briew uba la tip kyrteng kum u Allim Uddin uba dei na Jalalpur, Assam.
Ki pulit kham hadien ki la kem noh ïa u Gopal Marak na Pyrtakuna bad ha ka jingtohkit u la iathuh ba u Allim u la bthah ïa ki ban leit sha Wahkoh bad ai ruh ïa u nombor phone jong u briew uba ki thmu ban leit shim ïa katei ka pisa.
U la ong ba mar ïa poi ha Wahkoh, u Kornal u la leit ban iakynduh ïa utei u briew. Hynrei, kynsan kumba 3 haduh 5 ngut ki briew ki bym lah ban ithuh ki la mih na ka jaka ba long khlaw ha ryngkat ki wait bad ki la bat jubor ïa u, katba u Gopal bad u Jakir ki la ioh ban phetkrad sha ka thaiñ Umkiang.
Na ka liang ki pulit mynta ki dang pynlong ïa ka jingtohkit bniah halor kane ka jingjia.