Ha ka sngi sdang ka Dorbar Synrai, pahara jur ki pulit Rapid Action Force bad pulit jylla ïa ka Assembly

Shillong, Nailar 24: Ka Dorbar Synrai kaba san sngi jong ka Meghalaya Legislative Assembly ka la sdang ha ka sngi Nyngkong ka 24 tarik bad ïa kane ka sien shong dorbar ka la sdang hapdeng ka jingpynjur ka jingpahara ban pynthikna ba kan nym don kano kano ka jingpynthud ha kane ka jingïashong dorbar.
Ki bor jong ka District Administration ki la pynkhlaiñ ïa ka jingpahara sawdong ka Ïing Dorbar Thaw aiñ ka jylla da kaba pynap ïa ki pulit Rapid Action Force nalor ki pulit jong ka jylla ban pynthikna ba ka jingpahara kan long kaba khlaiñ bad kaba shongsuk shongsaiñ bad kaba shngaiñ.
Kane ka jingpynkhlaiñ ïa ka jingpahara ka dei namar ba ka Khasi Student’s Union ka la khot ïa ka jingïakhih shong kyllaiñ myngor ha ka sngi Nyngkong hakhmat u dur mot ba shi rynieng jong u Woh Kiang Nangbah ha khmat Civil Hospital, Barik Shillong.
Ban pynthikna ba ka KSU kan nym ïoh ban pynlong ïa kane ka jingïakhih shong kyllaiñ myngor ki bor jong ka District Administration ki la pynpahara ïa katei ka jaka da ki pulit jong ka jylla ba kynthup lang ïa ki SOT.
Kane ka jingpahara mynta ka sngi la ïohi ha kylleng ki jaka ïew kum ka Khyndailad bad Mophran kiba dei ki jaka ïew, kane ka jingpahara la buh lang ïa ki kynhun pulit CRPF bad ki pulit ka jylla kiba lamkhmat ïa kane ka jingpahara ka long ban wanrah ïa ka jingsngew shngaiñ ki paidbah ha ka leit ka wan ka jong ki ha kine ki sngi ba mih ki kynrum kynram bad ki huri hura hadien ba la don kiba shim kabu ha ka jingïaid bike rally ka KSU mynha ka 19 tarik mynta u bnai.