Dei ban ujor ejahar ïa kito kiba pynthut ïa ka leit ka wan ki kali kit mar sha jylla: Dr.Mukul

Shillong, Nailar 24 : U Nongïalam ka Liang Pyrshah u Dr Mukul Sangma ha ka Lah Sngi U Blei ula dawa ba dei ban rejistar ïa ki ejahar pyrshah ïa ki kynhun kiba donkti ha ka ban khang bad pynthut ïa ka leit ka wan jong ki kali kiba kit ïa ki mar kiba kongsan, hadien ba jia ki kam thombor ha ka 19 tarik u Nailar haba maham ba kane ka rukom leh ka dei kaba buh ha ka jingma ïa ka jylla.
Haba kren hapoh ka ïing Dorbar Thawaiñ u Dr Mukul ula ong “Ngi lah sakhi ïa ka jingjia ka bym shym poi pyrkhat kaba la mih ha ka 19 tarik u Nailar ha kaba ki paidbah ka jylla hi ki la mad ïa ki jingeh kiba khraw ”.
“Kumno ka jylla ka la shah thombor bad don hapdeng ka jingma kaba khraw, ha ki kynhun bad kumno ka jingshalan ïa ki mar ki mata kiba kongsan ki la shah pyndik, kane ka dei kaei kaei kaba sngewkhia bha. Ngi kwah ban tip, kiei ki sienjam kiba ka sorkar ka la shim bad kumno ïa kum kitei ki jait jingjia dei ban tehlakam ha ki por ki ban wan bad kumno yn leh kat kum ka aiñ ïa ki kynhun ba donkti khnang ba ka jylla kan ym shah thombor ha kano kano ka por” ula bynrap.
Hadien ba u Myntri Rangbah ka Jylla u Conrad K Sangma ula wanrah ïa ka ‘Suo Motu Statement’ halor katei ka jingjia, u Nongïalam ka Liang Pyrshah ula dawa ba dei ban leh da kaba tyngeh ïa kiba pynthut ïa ka jingïaid ki kali kit mar katkum ki kyndon jong ka aiñ.
“Kiei kiei ki sienjam kiba la shim da ka Sorkar Jylla ka dei kaba hap ban ai jingïaroh hynrei ka jingshisha ka long ba ym don uno uno ruh uba don ïa ka hok ban thombor bad buh hapdeng ka jingma ïa ka jylla bad ban pynthut ïa ka jingpynpoi ïa ki mar kiba kongsan. Hato ka Sorkar ka lah ujor da ka ejahar pyrshah ïa kito ki kynhun kiba khang ïa ka surok?” buh jingkylli u Mukul Sangma.
“Ngi dei ban don ïa ka bor ban sngewthuh lypa pyrshah ïa kitei ki jingjia kiba pynlehraiñ ïa ka jylla, namar ba kine ki long kiba ma bha ïa ka jylla. Nga kyrpad ba dei ban shim khia ban ithuh ïa kine. Nga dawa ba dei ban ujor da ka ejahar pyrshah ïa kito ki kynhun kiba la thombor bad buh hapdeng ka jingeh ïa ka jylla, khamtam eh ha ka ban pynthut ïa ka kit ka bah ïa ki mar kiba kongsan. Lym kumta, lada ngim leh eiei, ngin sa ïohi biang ïa kum kine ki tamasa na ka por sha ka por” ula ong.
Hadien ba kylli halor kitei ki jingdawa, u Myntri Rangbah u Conrad K Sangma ula ong, “Ngi dang tohkit ha baroh ki liang bad ngin shim la pynkut noh ïa kino kino ki bynta”.