Thung ka tnad pulit da u Sahep Nodal ban peitngor ïa ka ïaid ka ïeng ki kali hapdeng ka Meghalaya bad Assam

Nongpoh, Nailar 24: U Superintendent of Police ka Ri-Bhoi District, u la pynmih ïaka hukum bad pyntip bala thung ïa uwei u ophisar kum u Nodal Officer ban pdiang ïa ki jingeh bad ki jingud jong ki nongñiah kali Tourist Taxi ka jylla Meghalaya lada ki mad jingeh hapoh Ri-Bhoi District.
La thung ïa SI Deepak Thapa, Liaison Officer, kum u Nodal Officer ban pdiang ïa kino kino ki jingeh ne ki jingud jingnam na ki nongñiah Tourist Taxi da kaba phone ha u number 84149 44910.
Shuh shuh, la kyrpad ruh ïa ki nongñiah kali kamai ba kin phone ruh sha Police Control Room, Nongpoh, kaba treikam 24 kynta, ha u number 69093 00160, lada don kino kino ki jingeh ba ki kwah ban pyntip sha ki pulit bad kane ka hukum kan treikam mardor tad haduh ban da pynbna da kumwei.
La pynmih ïa kane ka hukum ban pynthikna ïaka jingshngaiñ ki paidbah ha Ri-Bhoi District bad ban lait na kano kano ka jingshah pynthut ki kali ba leit ba wan.