Shillong,Nailar 24 : U Symbud Myntri Rangbah ka Jylla, Bah Sniawbhalang Dhar ha ka sngi Nyngkong u la ong ba ka Shopping Mall ha ka Khyndailad ka la jan dep artad mynta bad ki khmih lynti ruh ba la kumno kumno mynta u snem kin sa lah ban pyntreikam noh ïa ka.
“Ïa ka Mall ha Polo, ngi la dep, la slem, ngi la khot ïa ka Epression of Interest lai sien hynrei ym don ba wan thep, imat namar ka dor ka heh palat. Kumta, mynta ngi la rai ban pynhiar ïa ka dor, bad ban khot ïa ka EOI sa shisien,” u la ong.
Shuh shuh u la ïathuh ba mynta ki dang pynkhreh bad ki la pyrkhat bad ban ailad ïa baroh khnang ba ki trai shnong kin lah ban shim bynta lang.
Ha kajuh ka por u la kyntait ba ka sorkar kan shim hi bad pynïaid hi namar ka thong hi ka long ban aikam aijam ïa ki khun samla. “Lada ka sorkar ka shna hi bad ka die hi, ngin poi shaei,” u la ong.
Kumta u la ong ba lada dei na ka jingheh palat ka dor ba ki paidbah kim treh ban shimti, kumta na ka liang ka sorkar ruh kan sa peit bad bishar ban pynhiar noh ïa ka dor ruh.
