Lah weng shipor ïa ka pakhang surok hadien ba seisoh ka jingïakren ka Meghalaya-Assam

Shillong, Naialr 22 : Ki nongïakhih ha Jorabat ki la weng noh shwa ïa ka jingkhang ïaid kali hadien ka jingtuklar ka Sorkar Meghalaya bad Assam bad ka jingïakren hapdeng u Symbud Myntri Rangbah ka Meghalaya u Ma Sniawbhalang Dhar bad u Myntri Sorkar ka Assam u Atul Bora.
ïa kane ka rai la pynbna hynne ka sngi Saitjain, da ki nongïalam jong ki kynhun kiba pynlong ïa ka jingïakhih kiba kynthup ïa ki Association kiba mihkhmat ïa ki nongñiah jong ki kali kamai na Assam.
ïa kane ka jingkhang ïaid kali la weng hadien ba u Myntri Sorkar ka Assam u Atul Bora ryngkat bad Guwahati Commissioner of Police u Partha Mahanta kila ïakynduh ïa kiba trei ha ka kam ñiah kali bad ki kynhun sengbhalang kiba pynlong jingïakhih ha Jorabat.
Ha katei ka jingïalang, kine ki nongïakhih, la pyntip ba ka Sorkar Meghalaya kala long kaba la pynkhreh ban ai ïa ka jinglutksan ne Compensation sha ki bahaïing bahasem jong kito kiba mynsaw ha ka jingjia kaba dang shen ha Shillong. La pyntip ruh ba ka la don ka jingthaw ïa ka Special Investigation Team (SIT) ban tohkit halor katei ka jingjia.
Hadien jong kane ka jingtuklar bad ka jingai ïa ka jingkular, ki nongïakhih kila mynjur ban weng noh shipor ïa ka jingïakhih ka jongki.
Hynrei ki nongialam jong kane ka kynhun kaba pynlong ïa ka jingïakhih ki la byrngem ba ki lah ban bteng biang ïa ka jingkhang ban ïaid ki kali lada ka Sorkar Meghalaya ka pulom ha ka ban pynurlong ïa ka jingai jingkular khamtam eh ha kaban siew ïa ka bai lutksan.
Kane ka jingmih kala wan hadien ba kala don ka jingpynibor hapdeng ka Meghalaya bad Assam hadien ba kala don ka jingjia jong ki kam thombor ha Shillong bad ka jingïapynibor ha ka khappud jong kine ki ar tylli ki jylla.