Khang ban ai umphniang petrol ha ki bitor ne klong, pynmih hukum u DC Ri Bhoi

Nongpoh, Nailar 21: Hadien ka jingïoh khubor halor ka jingkhang surok bad ruh ka jingpynthud ïaka leit ka wan ki paidbah khamtam ki kali kit marbam bad kiwei kiwei ki mar ba kongsan ki ban rung sha Ri-Bhoi District, u District Magistrate ka Ri-Bhoi u la maham ba kino kino ki briew kiba pynthud ïaka leit ka wan ki kali kit marbam bad ki mar ba kongsan kin ngat haka jingpynshitom katkum ki kyndon aiñ.
Kitei ki kynthup naduh ki umphñiang petrol/LPG, ki um dih, ki mar bam, ki dawai, oxygen bad kiwei kiwei ki mar ba kongsan kiba ïadei bad ka jingim bad ka koit ka khiah ki paidbah.
Kumta na ka liang u District Magistrate, hapoh ki kyndon jong ka BNSS, 2023 bad kumjuh ruh ka Essential Services Maintenance Act (ESMA) bad Essential Commodities Act, 1955, u la bthah baroh ki kali kim dei ban shah pynthud bad ki briew kiba pynthud ïakitei ki kali kin ngat ha ka jingpynshitom katkum ki kyndon aiñ. La ai bor ruh ïaki pulit ophisar ba kin kem khlem kano kano ka warrant ne jingbit ïaki briew kiba pynkheiñ aiñ, bad ki kali kit mar bam ki don hok ban ïaid baroh 24 kynta ha baroh kawei ka district bad kane ka hukum kan treikam tad haduh ban da pynbna da kumwei.
Shuh shuh namar ka jingdon ki nongshim kabu kiba thmu ban wanrah jingkulmar da kaba kawang petrol bom bad kiwei kiwei, kaba lah ban pynthud ïaka shongsuk shongsaiñ bad pynjot ïaki mar ki mata naka liang u District Magistrate u la pynmih ruh ka hukum ban khang pyrshah ban die khutia ïaki petrol haki bilor ne ki klong ne kino kino ki jait jingdiang, hynrei ban thep beit haki kali.
Haba ïadei bad kino kino ki jingdonkam kyrkieh ban pyndonkam haki generator jong ki mobile tower ne ba ïadei bad ka koit ka khiah, yn lah ban ai tang haki jaka thep bala ai kyrpang da ki nar bad ki petrol pump ki dei ban buh da ka register ban thoh ïaki kyrteng, ki jaka sah, ki phone number, ki ID, ki number kali, ka muhor bad la bthah ruh baroh ki Petrol Pump kin pyndait ruh ïaki CCTV kiba treikam 24X7 bad kiba pynkheiñ kin ngat haki kyndon aiñ bad wat ban shah weng ïaka laisen jong ki.
La aibor ruh ïaki pulit ophisar ba kin pynlong ka jingjurip ba kynsan man ka por bad ban kem ïa kiba leh pyrshah.