Da ka dorkhas sha ki 36 ngut ki MLA ka Ri Lum Khasi-Jaintia pynpoi ka KSU, yn ailang ruh sha ki MLA na Rilum Garo

Shillong, Nailur 21: Ka Khasi Students’ Union (KSU) ha ka sngi Thohdieng ka la pynbna ba ki la shim ïa ka rai ban pynkylla noh ïa ka rukom ïakhih jong ka da kaba shim noh da ka sienjam ban ai dorkhas sha baroh ki MLA halor ki mat ïakhun jong ka khnang ba kin rah ban ïatai ha ka Dorbar Synrai kaban sdang naduh ka 24tarik mynta u bnai.
Na ka liang u President barim ka KSU, Bah Lambokstar Marngar u la ong ba ka Seng ka la pynkylla ïa ka rukom ïakhun jong ka ha kane ka kynti. U la ong ruh ba ki nongïalam ka Seng kin leit ban ïakynduh ïa baroh 60 ngut ki MLA ban pynkynmaw ïa ki, ba ki dei ban rah ïa kine ki mat ïatai hapoh ka Ïing Dorbar Thawain ka Jylla.
Ha kajuh ka por u la pyntip ba ki la pynsangeh noh ïa ka jingshong kyllain myngor ha Khyndailad kaba ki la buh ban pynlong ha kane ka sngi Thohdieng namar ba ki bor distrik ki khlem ai jingbit.
Katkum ka kyrwoh ba la phah da u Samla Pynshai Rani ba dei u Assistant General Secretary ka Seng la ïathuh ba ha kane ka sngi ka Seng ka la phah da ka Dorkhas sha baroh ki 36 ngut ki Nongmihkhmat Paidbah (MLA) ka Bri Hynniewtrep kum shibynta ban pynbor ïa kine ki Nongmihkhmat ban kren bad pynsngew ïa ki 5 tylli ki mat jingdawa kiba ka KSU ka la buh ha khmat ka Sorkar Jylla khamtam ba ka Dorbar Synrai jong ka Meghalaya Legislative Assembly kan sdang naduh ka 24 Tarik mynta u Bnai.
“Nalor ki 36 ngut ki MLA na Ri Lum Khasi yn pyrshang pynpoi ruh sha ki 24 ngut ki MLA ka Ri Lum Garo,” ong ka kyrwoh da kaba pyntip ba ha kane ka jingleit aiti ïa kine ki Dorkhas sha kitei ki nongmihkhmat la ïa shim bynta da ki dkhot na ki Unit bad Circle kiba hap ha ki constituency kaba ki MLA ki mihkhmat.
“Ïa ki MLA la jied da ki paidbah bad ka dei ka kamram jong ki ban kren ïa ki mat ki jura kiba ktah ïa ka lad ïoh kam ïoh jam bad ïa ki jingeh jong ka Jaitbynriew ruh baroh kawei. Kumta ka seng ka ieh ha ka jingstad jong ki Nongmihkhmat ïa ka kamram kaba ki dei ban leh. Ka Seng kan ym shong kli kti ban ïakhih ïa kitei ki mat jingdawa katba ka sorkar Jylla kam pat lah ban pyntreikam pura ïa ki jingangnud kiba ka seng ka la buh ha khmat ka Sorkar,” ong ka kyrwoh.
Ka kyrwoh ka ong ruh ba ka seng ka la rai ban pynlong ïa ka jingshong kyllain Myngor ha ka 24 tarik mynta u bnai ha u motdur ba shi rynnieng jong u Woh Kiang Nangbah mar pyrshah bad ka Shillong Civil Hospital naduh ka por 11 baje mynstep. Bad ha ka sngi ba bud pat kata ka 25 tarik yn pynlong ïa ka jingshong kyllain myngor sa ha ki 7 tylli ki District jong ka Bri u Hynñiewtrep.
“Ha kaba ïa dei bad lashai ka sngi ka 22 tarik ka Seng kan ym buh ïa kino² ki prokram jingïa khih khnang ba kan ym pynwit ïa ki Samla ki ban ïa khun ïa ka Eksam LDA ba la pynïaid da ka MPSC,” ong ka kyrwoh.
Lah ban kdew hangne ba san tylli ki mat ba ka KSU ka dawa ka kynthup ïa ka jingdawa pynshitom ïa u Deputy Commissioner, Superintendent of Police, ki Heh Pulit bad ki nongtrei ka MSPCB namar ka jingkhang ïa ki paidbah ban leit ïashimbynta ha ka public hearing ka Shree Cement ha East Jaintia Hills ba long ha ka 31 tarik Naitung.
Kiwei pat ki mat dawa ki dei ka jingpyntreikam pura ïa ka Meghalaya Residents Safety and Security Act, 2016 haduh ban da pyntreikam ïa ka Inner Line Permit, ban pynieng ïa ki facilitation centre ha baroh ki 18 tylli ki entry point ha ri-lum Khasi bad Jaintia ryngkat ka jingpynshisha da ki Dorbar Shnong.
Nangta ka jingpyntreikam ïa ka Migrant Workmen Act, 2020 ba la pynkylla, ka jingpynkylla thymmai ïa ka thungkam thungkam ha NEIGRIHMS da 80:20 ïa ki nos kynthei-shynrang, bad ka bhah thungkam ïa ki trai shnong bad ban weng noh ïa ki interview ha ka thungkam ïa ki kam Grade B,C bad D nalor ban don ka SoP ha baroh ki Recruitment Board.